Þrítugur maður á Hólmavík, Ingólfur Kristjánsson, hefur verið ákærður fyrir sérstaklega hættulega líkamsárás og morðhótun sem eiga að hafa átt sér stað aðfaranótt laugardagsins 20. október árið 2018.

Málið verður þingfest í Héraðsdómi Vesturlands þann 13. mars næstkomandi en DV hefur ákæru héraðssaksóknara undir höndum.

Meint árás á að hafa átt sér stað á Grundarfirði. Ingólfur er sakaður um að hafa ýtt öðrum manni upp að grindverki, tekið um háls hans og þrengt að þar til manninn fór að svima, og á sama tíma hótað að drepa hann. Maðurinn á að hafa fallið í jörðina og Ingólfur þar veist að honum með spörkum í höfuð hans og búk með þeim afleiðingum að gleraugu mannsins brotnuðu. Hlaut maðurinn, því er segir í ákæru: …„2-3 mm breiða aflanga roðabraut með punktblæðingum hægra megin á hálsi sem lá um 8 sm frá framanverðum hálsi og aðeins uppávið og aftur, ofan við hana annað aflangt roðasvæði um 3-4 sm langt með punktblæðingum og vinstra megin á hálsi svipað far um 8-9 sm langt sem lá frá framanverðum hálsi og aftur og aðeins upp, einnig með punkblæðingum. Þá hlaut hann einnig 13 mm sár á enni, vægan bjúg á efra augnloki og roða í innanverðu augnloki vinstra auga, um 2×2 sm bólgusvæði með roða utanvert á vinstri handlegg um 12 sm neðan við olnboga, um 2 sm roðablett neðan við hnéskel á vinstri fæti auk eymsla við að kyngja og hreyfa höfuð og höfuðverk.“

Héraðssaksóknari krefst þess að Ingólfur verði dæmdur til refsingar og greiðslu alls sakarkostnaðar.

Hinn meinti þolandi gerir einkaréttarkröfu upp á 1.145.005 krónur í miskabætur.