„Ég er í stórvandræðum. Ég átti að koma heim 29. febrúar. Ég tók út peninga, að andvirði 180.000 krónur íslenskar, og ætlaði að kaupa farmiða. Á leiðinni heim var ég rændur, allir peningarnir teknir, vegabréfið og farsími,“ segir Haraldur Gunnar Húbertsson, sem situr fastur í Kenya og reynir að komast heim til Íslands.

Haraldur segir að ræningjarnir hafi ekki beitt hann líkamlegu ofbeldi heldur kænsku, skorið í sundur tösku hans, svokallaða „man bag“ og hirtu verðmætin hljóðlega.

Haraldur segist hafa soltið undanfarnar vikur í Kenya en þó er hafin söfnun góðs fólks í kringum hans, er búið að safna andvirði 20-30 þúsunda króna, að hans sögn, sem þó dugar skammt.

Hann hefur verið í sambandi við danska sendiráðið en segir það ekki hafa getað hjálpað sér. Ekki er íslenskt sendiráð í Kenya.

Haraldur Gunnar Húbertsson er 48 ára gamall og er upprunalega frá Þýskalandi. Hann flutti til Íslands árið 1993. Hann er giftur erlendri konu sem býr hér á landi og á með henni son sem fæddist eftir að Haraldur freistaði gæfunnar í Kenya í vor. Það ævintýri hefur reynst litlu fjölskyldunni dýrkeypt.

„Mér var sagt að það væri gott að eiga viðskipti í Kenya svo ég reyndi að stofna hér fyrirtæki. En það var allt mjög erfitt og þegar þeir sjá hvítan mann þá verður allt svo dýrt. Ég var því eiginlega rændur oft hér,“ segir Haraldur sem er orðinn svo slyppur og snauður að hann kemst ekki burt.

„Ég vil sjá sex mánaða gamlan son minn. Ég þrái bara að komast heim enda á ég son á Íslandi sem hefur ekki séð mig, hann er núna sex mánaða,“ segir Haraldur.

DV hafði samband við utanríkisráðuneytið vegna máls Haraldar. Ráðuneytið tjáði DV að Haraldur hefði verið í sambandi við íslenska sendiráðið í Úganda sem væri að aðstoða hann.

Haraldur vildi skilja eftir símanúmer í fréttinni og þeir sem geta hugsanlega aðstoðað hann geta hringt í það: 00254 768 551 331.

Þeim sem vilja hjálpa Haraldi fjárhagslega er bent á reikning eiginkonu hans: kt.:221268-2539, reikningsnúmer 0541-26-002539