Björgunarsveitin Dalbjörg í Eyjafirði er nú á leið til byggða með tvo skíðagöngumenn sem ætluðu sér að þvera hálendi Íslands frá norðri til suðurs. Þetta kemur fram í tilkynningu frá Landsbjörgu.

Mennirnir óskuðu eftir aðstoð í gegn um tengilið sinn í Kanada og þar sem upplýsingar voru ekki skýrar var ekki vitað nákvæmlega um ástand mannana. Þeir höfðu þó gert rétt í undirbúningi sínum, voru í sambandi við Safe Travel, skildu þar eftir ferðaáætlun sína og aðgang að ferli sínum í gegn um neyðarsendi. Því var hægt að sjá allar upplýsingar um mennina svo og staðsetningu auk þess að haft var samband við tengilið varðandi nánari upplýsingar.

Tveir vélsleðamenn fóru úr Eyjafirði fyrr í dag og gátu ekið beint á mennina þar sem þeir voru í tjaldi við Svíná austan Urðavatna ofan við Eyjafjörð. Annar mannanna var orðinn blautur og kaldur og áttu þeir því í erfiðleikum með að snúa við til byggða eða halda áfram. Beðið er eftir björgunarsveitarbifreið úr Eyjafirði og verða mennirnir fluttir til Akureyrar. Þeir geta þó vel við unað því með góðum undirbúningi og skráningu ferðaáætlunar með helstu upplýsingum hjá Safetravel var hægt að aðstoða þá fljótt og vel og fór því betur en annars hefði getað farið.