Íslenskur karlmaður sem er sýktur af COVID-19 veirunni biður almenning um að hætta slúðri um sig. Í stöðufærslu á Facebook biður hann vini sína um að bera ekki á borð sögur um að hann hafi farið í Hagkaup eða sund, líkt og hann nefnir. Maðurinn baðst undan að tjá sig nánar um málið í samtali við DV.

Hann segist þurfa að biðja vini og vandamenn um þetta að gefnu tilefni. Hann hafi verið í sóttkví heima hjá sér vegna veirunnar og sögur um ferðir hans meðal almennings séu uppspuni frá rótum. Hann segist þó skilja slíkar sögusagnir í ljósi ástandsins en biðlar til fólks að halda ró sinni og sverta ekki mannorð þeirra sem eru sýktir.

Átta Kórónuveirusmit hafa greinst hér á landi í dag. Fjöldi smitaðra Íslendinga er því kominn upp í 34. Öll tilfellin eru rakin til ferða Íslendinga til Norður-Ítalíu og Austurríkis. Íslensk stjórnvöld hafa gripið til hnitmiðaðra varúðarráðstafana til að koma í veg fyrir víðtæka útbreiðslu COVID-19-veirunnar. Engin smit hafa greinst sem rekja má til innlendra smitleiða.

Í fréttatilkynningu frá Sóttvarnalækni og Almannavörnum í gær var ítrekað mikilvægi þess að  fólk sem hefur verið á skilgreindum hættusvæðum virði ráðleggingar um sóttkví, en í þeim felst að forðast samneyti við aðra einstaklinga í 14 daga. Á mannamótum er einkar mikilvægt að til staðar sé aðstaða fyrir handþvott og handsprittun. Mælst er til að fólk noti aðrar kveðjur en handaband og faðmlög.