Guðjón Skarphéðinsson hefur stefnt ríkinu og krafist 1,3 milljarða króna í bætur vegna Geirfinnsmálsins. Aðalmeðferð málsins fer fram í Héraðsdómi Reykjavíkur 17. mars næstkomandi. Ríkið fer fram á að vera sýknað af öllum kröfum Guðjóns. Í gær fór undirbúningsþinghald fyrir aðalmeðferðina fram í Héraðsdómi Reykjavíkur. Þar sagði Andri Árnason, settur ríkislögmaður, að hann hyggist leiða tvö vitni fyrir dóminn ef heilsa þeirra leyfi. Hann vildi ekki gefa nöfn vitnanna upp að svo stöddu til að vernda þau gegn ágangi. Hann tók þó fram að viðkomandi hefðu unnið að rannsókn Guðmundar- og Geirfinnsmálanna.

Fréttablaðið skýrir frá þessu. Fram kemur að settum ríkislögmanni hafi verið gert að tilkynna dómnum um nöfn vitnanna viku áður en aðalmeðferðin fer fram.

Ragnar Aðalsteinsson, lögmaður Guðjóns, sagðist ekki ætla að leiða þá Gísla Guðjónsson, réttarsálfræðing, né Jón Friðrik Sigurðsson, geðlækni, sem vitni í málinu því ríkið leggist svo harðlega gegn því.

Gísli og Jón Friðrik gerðu ítarlega rannsókn á játningunum í Geirfinnsmálinu og komust að þeirri niðurstöðu að Guðjón hefði veitt falska játningu um aðild sína að hvarfi Geirfinns. Settur ríkislögmaður telur að sérfræðiálit um falskar játningar hafi ekkert sönnunargildi í málinu.