Haraldur Johannessen hefur látið af embætti ríkislögreglustjóra en þann 9. desember var staðan auglýst. Umsóknarfrestur er til og með 10. janúar næstkomandi og því enn hægt að sækja um embættið.

Kjartan Þorbergsson, lögreglustjóri á Suðurlandi, gegnir embættinu tímabundið, eða þar til nýr ríkislögreglustjóri hefur verið skipaður.

Í Fréttablaðinu í dag er ljósi varpað á hugsanlega eftirmenn Haraldar í embætti og nokkrir einstaklingar nefndir til sögunnar. Meðal þeirra er Sigríður Björk Guðjónsdóttir, lögreglustjóri á höfuðborgarsvæðinu, Halla Bergþóra Björnsdóttir, lögreglustjóri á Norðurlandi eystra, Páley Borgþórsdóttir, lögreglustjóri í Vestmannaeyjum og Ólafur Helgi Kjartansson, lögreglustjóri á Suðurnesjum. Þá er Alda Hrönn Jóhannsdóttir, saksóknari hjá lögreglunni á Suðurnesjum, orðuð við embættið.

Ólafur Þór Hauksson, sem skipaður var sérstakur saksóknari í kjölfar hrunsins, er einnig nefndur til sögunnar. Hann var skipaður héraðssaksóknari árið 2015. Páll Winkel, forstjóri Fangelsismálastofnunar, er einnig orðaður við stöðuna. Hann hefur verið fangelsismálastjóri frá 2008 en áður starfaði hann hjá embætti Ríkislögreglustjóra og var meðal annars aðstoðarríkislögreglustjóri um skamma hríð árið 2007.

Enginn þeirra sem Fréttablaðið ræddi við og orðaðir hafa verið við embættið vildu tjá sig opinberlega um hvort þeir hafi eða ætla að sækja um embættið.