Lögreglan á höfuðborgarsvæðinu fékk tilkynningu um líkamsárás í heimahúsi í Hafnarfirði á áttunda tímanum í gærkvöldi.

Meiðsli þolanda voru sem betur fer ekki alvarleg en að sögn lögreglu var lagt til hans með hnífi. Lögregla handtók sakborning á vettvangi og vistaði í fangageymslu. Málið er í rannsókn.

Nokkru áður, eða á sjöunda tímanum, hafði lögregla afskipti af ökumanni sem ók eftir göngustíg í Hlíðunum. Ökumaðurinn er grunaður um ölvunarakstur en í bílnum var farþegi sem reyndist vera án landvistarleyfis. Ökumaðurinn var látinn laus eftir sýnatöku en farþeginn var vistaður í fangageymslu.

Lögregla fékk tilkynningu á tíunda tímanum í gærkvöldi um að bifhjóli væri ekið mjög óvarlega í bílakjallara í Kópavogi. Við afskipti lögreglu kom í ljós að ökumaðurinn var réttindalaus og bifhjólið án skráningarnúmers og ótryggt.

Loks var tilkynnt um árekstur í Árbænum um kvöldmatarleytið í gær. Þar hafði verið ekið aftan á kyrrstæða bifreið. Ökumaðurinn er grunaður um akstur undir áhrifum áfengis og fíkniefna. Honum var sleppt lausum eftir sýnatöku.