Atlli Fannar Bjarkason og Berglind Pétursdóttir eru þekktir og vinsælir dagskrárgerðarmenn í sjónvarpsþætti Gísla Marteins Baldurssonar, Vikan. Bæði eru með innslög sem þykja fyndin. Seint á síðasta ári greindi Vísir.is frá því að styrr stæði um launamál þeirra hjá RÚV. Nú kemur fram í nýrri frétt á Visir.is að Atli Fannar fékk fyrir árið 2017 greiddar 3,45 milljónir króna sem verktaki fyrir vinnu sína í þættinum en greiðslur til Berglindar voru 2,15 milljónir. Er því ljóst að Atli Fannar var á mun hærri launum.
Skarphéðinn Guðmundsson, dagskrárstjóri sjónvarps hjá RÚV, segir við Vísi að launamunurinn sé ekki óeðlilegur og ekki sé um kynjamismunun að ræða. Vinnuframlag beggja hafi einfaldlega verið ólíkt. Innslög beggja í þættinum voru þó álíka löng en á meðan Berglind fór um víðan völl og tók fólk tali sat Atli Fannar í sjónvarpssetti og fór yfir fréttir vikunnar með sínum hætti.
Einnig kemur fram í frétt Vísis að laun Berglindar voru hækkuð haustið 2018 vegna aukins vinnuframlags hennar.