Hildur Friðriksdóttir og Þura Snorradóttir, dóttir hennar, ákváðu í sumar að flytja til Kungsbacka í Svíþjóð til að Þura gæti farið í menntaskóla þar og æft sund í innilaug. Mæðgurnar búa á Akureyri en þar er aðeins útisundlaug og erfiðara fyrir Þuru að æfa ýmsar tækniæfingar í útilaug. Hún gat ekki farið í menntaskóla á höfuðborgarsvæðinu því þar eru engir menntaskólar með heimavist og leigumarkaðurinn þannig að fjölskyldan hafði ekki tök á að senda hana þangað. Það var því ódýrari kostur að flytja til Svíþjóðar.

Fréttablaðið skýrir frá þessu í dag. Fram kemur að allar yfirbyggðar stórar æfingasundlaugar séu nærri höfuðborgarsvæðinu en það hafi Þura ekki getað nýtt sér vegna skorts á heimavist. Hildur og Þuru flytja því til Svíþjóðar en eiginmaður Hildar og yngri dóttir þeirra verða eftir á Akureyri.

„Fyrst töldum við þetta svolítið fjarlægt. Hins vegar skoðuðum við málið og því meira sem við lögðumst yfir þetta sáum við að þetta var í raun miklu betri kostur en að fara til Reykjavíkur. Það virðist vera mun auðveldara að reka tvö heimili í Svíþjóð og á Íslandi en í Reykjavík og á Akureyri. Hér í Svíþjóð er mjög vel haldið utan um menntaskólanema með ókeypis almenningssamgöngum, fríum skólamáltíðum og íþróttaiðkun er mun ódýrari en á Íslandi. Þegar á heildina er litið er þetta því ódýrari kostur fyrir fjölskylduna.“

Sagði Hildur í samtali við Fréttablaðið.

Þura muna stunda nám á sérstakri sundíþróttalínu þar sem æfingarnar falla inn í námið. Hildur hefur fengið vinnu í Svíþjóð þar sem hún mun annast móðurmálskennslu og vinna á sambýli fyrir fatlað fólk.