Tannlæknirinn Bjarki Ágústsson sem hvarf í Hollandi sumarið 2017 frá rekstri sínum, sjúklingum, starfsfólki og öllum skuldbindingum, starfaði í tíu mánuði ársins 2018 á tannlæknastofu Heimis Hallgrímssonar í Vestmannaeyjum. Heimir Hallgrímsson er þjálfari hjá liðinu Al Arabi í Katar og eins og nær allir vita, fyrrverandi þjálfari íslenska landsliðsins í knattspyrnu.
DV fékk ábendingu frá lesanda um þetta fyrir nokkru en nokkuð langan tíma tók að ná sambandi við tannlæknastofuna í Eyjum. En í dag varð þar fyrir svörum kona sem starfar á stofunni og staðfesti hún að Bjarki hefði verið starfandi á stofunni í fyrra en sagði að hann starfaði þar ekki lengur. Hún veitti DV einnig þær upplýsingar að Bjarki sé staddur í Vestmannaeyjum núna. Hann býr þar hins vegar ekki. Konan vildi ekki gefa blaðamanni upp símanúmer Bjarka.
Samkvæmt upplýsingum frá hollenskum kollega Bjarka rekur hann tannlæknastofuna Scandinavia Dental í borginni Szecin í Póllandi. Þar hefur hins vegar ekki svarað í síma undanfarið. Bjarki mun vera giftur pólskri konu.
Rannsóknarnefnd á vegum hollenska heilbrigðisráðuneytisins hefur skilað skýrslu um mál Bjarka og er það nú komið fyrir dóm. Úrskurður liggur ekki fyrir en hætta er á því að Bjarki gæti misst starfsleyfið vegna viðskilnaðar síns í Hollandi. Sú starfsleyfissvipting myndi þó eingöngu gilda fyrir Holland og ætti því vart að snerta starfsferil Bjarka.
Sjá einnig: