„Ég hugsaði með mér að þetta væri kúl nafn og að mig langaði að heita þetta. Svo sótti ég um en fékk ekki. Ég ætla ekki að una þessu og er búin að senda mannanafnanefnd svar.“
Neitun Mannanafnanefndar kom henni á óvart og óskaði hún í kjölfarið eftir rökstuðning.
Samkvæmt rökstuðningi nefndarinnar uppfyllir nafnið kona skilyrði um eignarfallsendingu og er ritað í samræmi við almennar ritreglur. Hins vegar sé orðið samnafn sem er notað um kvenmann á ákveðnum aldri. Ekki var tekin afstaða til þess hvort nafnið væri til þess fallið að verða nafnbera til ama. Þó svo að Kona virðist ekki vera mjög frábrugðið þekktum karlmannsnöfnum, svo sem Karl, Sveinn eða Drengur, þá hafi þó ekki skapast hefði fyrir nafninu í íslensku samfélagi. Elín telur rökstuðning Mannanafnanefndar fela í sér kvenfyrirlitningu.
Elín ræddi rökstuðning mannanafnanefndar í fréttatímanum á RÚV í gær:
„Bara kvenfyrirlitning, hrein og klár. Ég ætla að klára þetta mál. Ég ætla að heita kona og ég ætla að fá þetta samþykkt. Ég þarf að finna einhverjar aðferðir til þess.“
Elín hefur tilkynnt Umboðsmanni Alþingis að hún uni ekki úrskurðinum. Hún segir að málstaður hennar hafi fengið mikinn stuðning frá samfélaginu en hún hafi meðal annars heyrt í einstaklingum sem hafa lýst áhuga á að hjálpa henni með málskostnað ef til þess kæmi.
„Mér finnst þetta stórt jafnréttismál að fá að heita kona alveg eins og að heita Karl. Hefðin á ekki að skipta máli. Við getum búið til nýjar hefðir. Hefðir eru bara hefðir, sumar hefðir eru vondar og við hendum þeim, sumar hefðir eru góðar og við tökum þær upp. Það er bara svoleiðis. Hefð getur verið eitthvað sem við byrjuðum á í dag og verður hefð á morgun.“
Eins og áður segir var beiðni Elínar hafnað á grunni þess að eiginnafnið Kona hefði ekki unnið sér hefð í íslensku máli líkt og nöfnin Karl, Sveinn og Drengur hafa gert.
Undanfarið hefur Mannanafnanefnd til dæmis samþykkt eftirfarandi eiginnöfn kvenna:
- Hrafnhetta
- Erlinda
- Lucia
- Kíra
- Náttúra
- Lynd
- Systa
- Ljósunn
- Kráka
- Zoe
- Vetrarsól
- Albjört
- Natalí
- Baldína
- Emanúela
- Einara
- Reyla
- Lella
- Sál
- Júlí
- Abel
Hins vegar hefur nefndin hafnað eftirfarandi:
- Kona
- Cleópatra
- Jette
- Thurid
- Ariel
- Ladý
- Myrká
- Yrena
- Alexsandra
- Mariko
- Ingadóra
