Landsréttur staðfesti rétt í þessu að peningar sem hlustandi Útvarps Sögu lagði inn á Arnþrúði Karlsdóttur hafi verið lán en ekki styrkur.
Forsaga málsins er sú að hlustandi Útvarps Sögu lagði töluvert fjármagn inn á Arnþrúði, í nokkrum millifærslum, á árunum 2016 og 2017. Mál þetta laut að því hvort um væri að ræða peningagjöf til útvarpsstöðvarinnar eða lán, en hlustandinn hafði ítrekað reynt að fá lánið greitt fyrir málshöfðun. Engir samningar voru gerðir um meinta lán- eða styrkveitingu. Við úrlausn málsins leit dómari til þess að Útvarp Saga hafi um árabil leitað til almennings til að fá fjárstuðning við rekstur stöðvarinnar, en slíkar greiðslur hafi þó verið gerðar inn á reikning stöðvarinnar sjálfar en ekki á persónulegan reikning Arnþrúðar, líkt og átti sér stað hér.
Hlustandinn hafði veitt stöðinni styrki, en lagði þá í þeim tilvikum beint inn á reikning stöðvarinnar. Dómara þótti ekki sannað að Arnþrúður hefði tekið við peningunum og lagt þá strax inn á stöðina. Hefði verið um styrk að ræða hefði Arnþrúður eða rekstrarfélag Útvarps Sögu átt að tryggja sönnun fyrir því að um styrk, en ekki lán, væri að ræða.
Áður hefur DV fjallað um yfirlýsingu sem Arnþrúður gaf eftir að Héraðsdómur féll í málinu. Þar hélt hún því fram að hlustandinn hafi verið neyddur af tengdadóttur sinni til að rukka fjárhæðina. Hafi tengdadóttirin orðið reið þegar hún fékk vitneskju um styrki til Útvarps Sögu og heimtað að tendamóðir sín rukkaði fjárhæðina til baka.
„Síðan liggur fyrir að Telma Cristel Kristjánsdóttir, verðandi tengdadóttir Guðfinnu, hafi komist að því að hún væri að styrkja Útvarps Sögu og trylltist yfir því. Hún hringdi í mig 10. apríl 2017 og hótaði mér því að ef ég féllist ekki á að kalla þennan styrk lán þá skyldi hún sjá til þess að ganga frá mannorði mínu og dreifa rógburði í alla fjölmiðla landsins,“
„Guðfinna var 57 ára þegar hún kom í húsakynni Útvarps Sögu til að gerast styrktaraðili og vildi ekki að nafn hennar kæmi fram á styrktarreikningi. Hún var augljóslega hrædd við tengdadóttur sína sem vildi yfirtaka öll hennar fjármál og meðal annars arf sem Guðfinna hafði fengið árinu á undan. Telma Cristel var sú manneskja sem beitti sér fyrir því að þetta yrði að dómsmáli og í raun veit ég ekki ennþá hver er að stefna mér. Það er alþekkt að ættingjar geta orðið hálfvitlausir þegar arfur er annars vegar.“
Sjá einnig:
Arnþrúður þarf að greiða 3,3 milljónir króna
