Gunnlaugur Gunnarsson hefur í tvígang reynt sjálfsvíg á síðustu 11 mánuðum þar sem hann missir saur í tíma og ótíma. Vísir greinir frá þessu. Hann lenti árið 2018 á Bráðamóttökunni vegna stíflu í þvagrás. Hann fékk töflur við þessu en það átti eftir að vera afdrifaríkt.

„Þessar töflur áttu að virka á þvagrásakerfið en það gleymdist að spyrja mig hvort ég væri með einhvern undirliggjandi sjúkdóm, sem ég var með og búinn að fá kransæðastíflu áður. Með þessu víkkuðu allar æðar á mér mjög mikið út. Þá verður rosalega mikið flæði upp í hjartað og það dælir alveg á fullu og hefur ekki undan. Þegar ég er búinn að taka tvær töflur líður mér eitthvað skringilega um morguninn og tek ekki þessa þriðju. Síðan þegar ég kem á spítalann grípur hjúkrunarkona um brjóstið á mér og segir strax, það er eitthvað meira en lítið að hér,“ segir Gunnlaugur.

Hann segir þetta hafa verið skelfilegt. „Síðan þegar þessu öllu er lokið er ég útskrifaður en síðan tveimur mánuðum seinna byrja ég að vera með hægðir af verstu gerð, allt upp í þrisvar á dag. Fyrst á morgnanna í föstu formi og hitt allt í fljótandi og enginn boð á undan sér. Ég er kannski bara staddur hvar sem er, undir stýri og maður þurfti bara að stoppa bílinn og girða niðrum sig á umferðareyju fyrir framan alla. Núna í dag er ég bara í bleyjubuxum.“

Hann segir að sér líði skelfilega illa vegna þessa. „Þetta lætur manni líða mjög illa. Það er litið á mann hornauga þegar maður lendir í svona vandræðum. Ég er búinn að prófa að reyna svipta mig lífi, því maður er ekkert góður svona.“