Það má reikna með hæglætisveðri um helgina sem margir myndu segja að væri kærkomið miðað við óveðrið sem gengið hefur yfir landið síðastliðinn sólarhring.
Þó vindur verði hægur má búast við miklu frosti um nær allt land eins og myndin hér að neðan ber með sér. Hafa ber í huga að tölurnar á umræddu korti geta verið fljótar að breytast en ef marka má textaspá Veðurstofunnar verður býsna kalt á landinu næstu daga.
Veðurstofan á von á því að það muni herða á frosti annað kvöld og á föstudag verði það á bilinu 5 til 15 stig. Á Hveravöllum og Sandbúðum gæti frostið farið niður fyrir tuttugu gráður.
Veðurhorfur á landinu næstu daga:
Á föstudag:
Norðlæg átt 5-13 m/s, skýjað og dálítil él á N-landi. Bjart með köflum annars staðar, en stöku él syðst á landinu. Frost 5 til 15 stig.
Á laugardag:
Norðlæg átt og stöku él með N-ströndinni og á SV-horninu, annars víða bjart. Áfram kalt í veðri.
Á sunnudag og mánudag:
Stíf norðaustanátt með snjókomu eða éljum, en þurrt S-til á landinu. Minnkandi frost.
Á þriðjudag:
Norðaustlæg átt og stöku él við N- og A-ströndina. Hiti um og undir frostmarki.