„Það er hreint ótrúlegt að skoða veðurathuganir á vef Veðurstofunnar,“ segir í frétt á veðurvefnum Blika.is sem birtist seint í gærkvöldi.
Þar kom fram að mestur vindurinn hafi mælst á toppi Skálafells, en þar mældust 58 metrar á sekúndu. Í frétt Blika kemur fram að það sé aðeins rúmum fjórum metrum á sekúndu frá mesta vindhraða sem mælst hefur á Íslandi.
„Ekki er útilokað að það met eigi eftir að falla í þessu óviðri. Einnig vekur athygli mikill vindur á Þingvöllum, 29 m/s og 42 m/s í hviðum. Svo háar tölur hafa trúlega ekki sést á Þingvöllum í háa herrans tíð. Að vísu sýnir mælirinn á Þingvöllum þveröfuga vindátt, en trúlega er hann vitlaust pólaður og sýnir réttan vindhraða,“ segir í fréttinni.
Þá er bent á athyglisverðar vindatölur í Reykjavík þar sem kortið gaf til kynna tólf metra á sekúndu.
„Byggð og gróður í nágrenni mælisins hefur greinilega áhrif á mælinguna á Bústaðavegi. Annars staðar á höfuðborgarsvæðinu mælist mun meiri vindur og hafa stöðvarnar Seltjarnarnes, Geldinganes og Straumsvík verið að sýna vindhraða 24 – 28 m/s meira og minna í allt kvöld.“
Veðrið náði hámarki í gærkvöldi en enn má búast við töluverðum vindi fram á hádegi í dag og á morgun. Þannig er gert ráð fyrir mjög slæmu veðrið sunnan Vatnajökuls og þar gæti vindur farið í 33 til 38 metra á sekúndu í dag.
Hér að neðan má sjá kort Veðurstofunnar frá því í gærkvöldi en það sýnir vindhraða á suðvesturhorni landsins. Ekki er algengt að svo háar tölur sjáist.