Um kvöldmatarleytið í gær var tilkynnt um umferðaróhapp í Kópavogi. Ökumaður reyndi að komast fótgangandi í burtu frá vettvangi en var handtekinn stuttu síðar. Lögreglumenn þurftu að nota varnarúða við handtökuna. Einn lögreglumaður slasaðist í átökum við ökumanninn. Ökumaðurinn er grunaður um akstur undir áhrifum áfengis og vímuefna og var vistaður í fangaklefa í þágu rannsóknar málsins.
Þetta kemur fram í dagbók Lögreglunnar á höfuðborgarsvæðinu. Þar segir einnig frá því að laust eftir kl. 2 í nótt óskaði leigubílstjóri eftir aðstoð vegna farþega sem svaf ölvunarsvefni í bíl hans. Var þetta í miðbænum. Eftir að tókst að vekja farþegann neitaði hann að segja til nafns eða gefa upp kennitölu og þá neitaði farþeginn einnig að greiða fyrir akstur leigubílsins. Farþeginn var handtekinn og laus eftir að búið var að staðfesta hver hann væri.
Klukkan hálftíu í gærkvöld var bíll stöðvaður í miðbænum sem hafði verið tilkynntur stolinn. Tveir menn voru í bílnum og voru þeir báðir handteknir í þágu rannsóknar málsins. Auk bílþjófnaðar er ökumaðurinn grunaður um akstur undir áhrifum fíkniefna, að aka sviptur ökuréttindum og fyrir vörslu fíkniefna.