Íslendingurinn Einar Örn varð vitni að hryðjuverkunum sem áttu sér stað í London í dag. Einar er tæknimaður hjá útvarpsstöð í London en hann var í matarhléi á svölum skrifstofunnar. Skrifstofan hans er við suðurenda brúarinnar en árásin átti sér stað við norðurendann. Mbl.is greinir frá þessu.
„Sólin skein glatt og ég hafði á orði við kollega minn hvað veðrið væri afskaplega gott,“ sagði Einar í viðtali við Mbl.is. „Svo verðum við varir við einhvern óróleika á brúnni og heyrum fólk hrópa til nærstaddra að forða sér í burtu. Þá heyrðust tveir hvellir, sem við héldum í fyrstu að væru flugeldar. Svo fylgdu fleiri skothvellir í kjölfarið og fyrr en varði var fjöldi lögreglubifreiða kominn á staðinn.“
Einar tók upp atburðarrásina en í upptökunni má sjá fólk flýja af brúnni.
— Einar Orn (@einarorn_) November 29, 2019
„Héðan fer enginn út og enginn inn,“ sagði Einar í samtali við blaðamann Morgunblaðsins en þá hafði lokunin staðið yfir í fjóra klukkutíma. Ásamt Einari eru um 2.400 manns sem sitja fastir í byggingunni og enginn veit hvenær má fara út. „Fólk sem hefur verið hér lengur segir mér að í hryðjuverkaárásinni 2017 hér á brúnni og á Borough Market hafi byggingum verið lokað í 18 klukkustundir en vonandi verður okkur hleypt út fyrr en það.“