Undanfarin misseri hafa þónokkrir Íslendingar verið rændir á Spáni. Þetta kemur fram á Facebbok-síðu þar sem að fjöldi Íslendinga sem annaðhvort býr eða ferðast til Costa Blanca-svæðisins, tjáir sig um allskonar mál.
Í gærkveldi birti einn meðlimur hópsins færslu er varðaði Íslendinga sem höfðu verið leikin grátt, en svo virðist vera að fólk verði að passa sig í utanlandsferðum.
„Íslendingar hafa verið rændir undanfarið og hefur ræðismaður Íslands gefið út 8 vegabréf á einni viku vegna þess. Fimm þeirra voru vegna rána í Consum í Orihuela! Það er því ástæða til að flíka ekki einu eða neinu, passa vel upp á veskin sín, vegabréf og peninga.“
Fyrir neðan þessa færslu hafa nokkrir einstaklingar skrifað ummæli, en í einu þeirra segir frá Íslendingi sem var rændur á flugvellinum í Alicante.
„Einn Íslendingur var rændur á flugvellinum í Alicante, hann var að ganga frá leigu á bíl, var með tösku vagn við hliðina á sér með nokkrum töskum á. Þegar hann var búin að ganga frá leigunni var ein taskan horfin, einhver hafði labbað fram hjá og kippt henni með og í henni voru vegabréf, tölva og fleira. Fór með hann til ræðismanns til að fá ný vegabréf og hann sagði mér að það væri gengi á flugvellinum sem stundaði þetta. Svo já við skulum vera á verði.“