Jón Gnarr hefur undanfarna daga farið mikinn á Twitter og boðað nýtt stjórnmálaafl. Ekki er ólíklegt að hann sé að hluta til að sprella en í ljósi kosningasigurs Besta flokksins ætti enginn þó að afskrifa hann sem stjórnmálamann. Jón nefnir þetta afl Síðasti séns flokkurinn.

Um helgina skrifaði Jón sitt fyrsta tíst um mögulegan flokk og fékk það gífurlega góðar undirtektir. „Væri gaman að stofna umhverfisverndarflokk, sem lýsir yfir neyðarástandi og hefur bara ömurlega hluti á stefnuskrá sinni; banna krússkip, leggja niður innanlandsflug, fækka rollum og beljum og banna jarðefnaeldsneyti og allskonar. Ætli einhver myndi kjósa það?,“ skrifaði Jón þá.

Í gær fór þessi hugmynd þó á flug og skrifaði hann tíst um málið á bæði ensku og íslensku. „Ég vil stofna umhverfisverndarflokk sem vill bara gera skelfilega hluti sem enginn annars flokkur vill gera. Við viljum banna næstum allt. Ólíkt öðrum flokkum þá ætlar Síðasti séns flokkurinn að vinna skref fyrir skref gegn efnahagnum. Það skiptir engu máli hvað þig langar að gera. Síðasti séns flokkurinn hyggst banna það og stöðva þig í að gera það. Kjóstu okkur og við lofum að rústa deginum þínum,“ skrifar Jón á ensku.

Sem dæmi um stefnumál nefnir Jón eftirfarandi: „Fyrsta verk umhverfisverndarflokksins míns yrði að banna flugelda og áramótabrennur. Fólk er örugglega rosalega spennt fyrir því! Eitt af verkum flokksins míns yrði að stöðva þá hallærislegu niðurgreiðslu á sorpi sem fram fer hér á landi. Það myndi þýða að fólk yrði sjálft að drösla sínum tunnum útað götu. Örugglega mikil stemning fyrir því hjá almenningi,“ skrifar Jón.

Að lokum lofar Jón því að hann muni mæta á þing í dragi til að tákna að það sem við þurfum að ganga í gegnum um verður erfitt og furðulegt en nauðsynlegt og gæti jafnvel orðið skemmtileg.

if I get elected I promise to arrive every day to parliament in drag as a symbol of the transaction we need to go through; tough and somewhat strange but necessary and can and should be fun #LastChanceParty

— Jon Gnarr (@Jon_Gnarr) November 5, 2019