Lögreglan á höfuðborgarsvæðinu stöðvaði för sautján ára ökumanns á Reykjanesbraut á tíunda tímanum í gærkvöldi. Bifreið piltsins mældist á 126 kílómetra hraða en á þessum kafla brautarinnar er 80 kílómetra hámarkshraði.
Að sögn lögreglu var pilturinn ekki með ökuskírteini sitt meðferðis og var málið afgreitt með aðkomu móður hans og tilkynningu til Barnaverndar. Samkvæmt sektarreikni á vef Samgöngustofu á pilturinn von á 130 þúsund króna sekt vegna hraðakstursins.
Lögregla handtók mann í annarlegu ástandi í Árbænum á sjöunda tímanum í gærkvöldi. Hann er grunaður um nytjastuld bifreiðar, akstur undir áhrifum áfengis og fíkniefna og ítrekaðan akstur sviptur ökuréttindum. Þá er maðurinn talinn hafa ekið á tvær bifreiðar og stungið af frá umræddum óhöppum. Maðurinn var vistaður í fangageymslu lögreglu.