Ríkisskattstjóri hefur sent áhrifavöldum og fyrirtækjum sem stunda viðskipti við þá bréf þess efnis að skattskil áhrifavalda hafi verið tekin til sérstakrar skoðunar. Viðskiptablaðið greinir frá þessu í dag.

Þar segir að bréfið sé sent vegna tekjuársins 2018 en ekki liggur fyrir hversu stór hópur er tekinn til skoðunar.

„Það hefur ekkert komið til okkar. Ef svör einstaklinga við fyrirspurnum RSK eru á þann veg að grunur vakni um refsiverð brot er metið hvort mál séu send til okkar. Sé það niðurstaðan tökum við við þeim og hefjum rannsókn sem felur í sér umfangsmeiri meðferð. Vaninn er að í slíkum rannsóknum séu fleiri gjaldár tekin til skoðunar,“ hefur Viðskiptablaðið eftir Bryndís Kristjánsdóttur skattrannsóknarstjóra.

Í fréttinni er minnt á að ríkisskattstjóri hafi í byrjun árs sent frá sér leiðbeiningar vegna skattskila áhrifavalda. Þar kom meðal annars fram að þeim bæri að skila upplýsingum um greiðslur til þeirra í janúar ár hvert. Allar tekjur væru skattskyldar, peningagreiðslur eða greiðslur í öðru formi, til dæmis með vörum.

DV fjallaði ítarlega um áhrifavalda fyrr á þessu ári og þá sérstaklega í sambandi við dular auglýsingar. Þar kom fram að Neytendastofa hefði eftirlit með dulum auglýsingum á samfélagsmiðlum og taki við ábendingum frá almenningi.

„Við fáum mjög mikið af ábendingum um duldar auglýsingar. Þær koma í skorpum og oft er það tengt einhverjum umfjöllunum í fjölmiðlum, en það kemur svo til að meðaltali ábending á hverjum degi,“ sagði Þórunn Anna Árnadóttir, sviðsstjóri neytendaréttarsviðs hjá Neytendastofu, aðspurð um þann fjölda ábendinga um duldar auglýsingar sem Neytendastofu berast alla jafna. Hún sagði að Neytendastofa þyrfti að hafa meiri mannskap til að anna öllum ábendingum og að flestar þeirra tengist áhrifavöldunum með flestu fylgjendurna. „Eðli málsins samkvæmt þá koma flestar ábendingar varðandi þá áhrifavalda sem hafa flesta fylgjendur og eru mest áberandi.“

Í frétt Viðskiptablaðsins eru rifjaðar upp tölur úr tekjublaði Frjálsrar verslunar þar sem tekjur 25 áhrifavalda voru birtar. Tekjurnar voru á bilinu 93 þúsund til 1,5 milljónir en miðgildið var tæplega 330 þúsund krónur.