Fimmtudagur 12.desember 2019
Fréttir

Sanna slátrar femínisma Íslandsbanka: „Ætlar bankinn að afnema hraðbankagjöld fyrir fátæku láglaunakonurnar?“

Ritstjórn DV
Mánudaginn 28. október 2019 11:48

Ekki missa af Helstu tíðindum dagsins í pósthólfið þitt

Lesa nánar

Sanna Magdalena Mörtudóttir, borgarfulltrúi Sósíalistaflokksins, skefur ekki af því í stöðufærslu á Facebook. Hún segir áætlunum Íslandsbanka um að hætta viðskiptum við þá fjölmiðla sem ekki standast tiltekin skilyrði sem snúa að kynjahlutföllum vera hræsni. Það var Edda Hermannsdóttir, markaðs- og samskiptastjóri Íslandsbanka, sem kynnti þessa stefnu. Að hennar sögn gæti bankinn gert margt til að bæta jafnrétti kynjanna en velur að gera einungis það sem hefur ekki áhrif á gróða bankans.

„Mér finnst frábært þegar fyrirtæki setja upp kynjagleraugun með gagnrýnum hætti og kveðja „auglýsingar hjá fjölmiðlum sem bjóða upp á afgerandi kynjahalla“ svo vitnað sé í markaðs- og samskiptastjóra Íslandsbanka. Bankinn greindi nýverið frá því að hann vildi horfa í auknu mæli til jafnréttismála. Það hallar víða á konur í samfélaginu og það þarf heldur betur að bæta úr því. Í ljósi umræðunnar sendi Íslandsbanki frá sér skilaboð á heimasíðu sinni sem hér segir: „Íslandsbanki hefur sett sér þá stefnu að vera hreyfiafl til góðra verka. Í kjölfar stefnumótunar bankans var í samræmi við hana ákveðið að vinna að fjórum heimsmarkmiðum Sameinuðu þjóðanna; lofslagsmálum, jafnrétti kynjanna, nýsköpun og menntun“,“ skrifar Sanna.

Sleppa mikilvægu markmiði

Hún segir að það jafnrétti sé ekki það fyrsta sem hún hugsar um þegar hún heyrir orðið banki. „Við þurfum að muna það að hér erum við að tala um banka. Banka, sem lánar fólki t.d. pening, sem það þarf að greiða til baka með háum vöxtum. Og við erum að tala um jafnréttismál, samanber femínisma. Þó svo að ég trúi því að fólk hljóti að meina vel með því að taka ákveðin skref í átt að jafnrétti, hér varðandi aukinn sýnileika kvenna innan karllægra fyrirtækja, þá bendir þetta á sama tíma okkur á hvernig starfsemi bankans í eðli sínu viðheldur ójafnrétti á öðrum sviðum. Hér erum við erum að tala um banka, sem í núverandi mynd er eitt af því kapítalískasta sem fyrirfinnst þannig ég sé ekki hvernig jafnrétti og banki eiga saman í sömu setningu. Í því samhengi sé ég ekki hvernig í ósköpunum banki getur verið hreyfiafl til góðra verka í jafnréttismálum?,“ segir Sanna.

Íslandsbanki hefur ítrekað borið fyrir sig að áætlunin sé hluti af markmiðum Sameinuðu þjóðanna. „Jafnrétti snýst um meira en það að skoða eingöngu hindranir sem kunna að vera á vegi fólks vegna kyns. Það þarf líka að skoða hvernig aðrir þættir, líkt og slæm efnahagsleg staða, mótar veruleika fólks og greina það í samspili við kyn og hvernig slíkt getur verið hindrun í átt að jafnrétti. Eitt af Heimsmarkmiðum Sameinuðu þjóðanna, sem er listað fyrst í upptalningunni er Engin fátækt. Hvernig ætlar bankinn raunverulega að vinna að jafnrétti ef hann ávarpar ekki þátt sinn í því að viðhalda efnahagslegu ójafnrétti? Ætli bankinn taki það kannski bara upp síðar í jafnréttisáætlun sinni, eða kannski aldrei?,“ spyr Sanna.

Hvað með fátækar konur?

Hún segir bankann lítið ræða fátækt. „Þegar orðið fátækt er slegið inn í leitarvél á heimasíðu Íslandsbankans, kemur ein niðurstaða fram en það er í byrjun á setningu sem hljóðar svo „Bankinn hefur meðal annars látið til sín taka í baráttunni við fátækt, heimsmarkmið 1 […] Hinn hluti setningarinnar telur síðan upp önnur heimsmarkmið sem bankinn vinnur að en ekkert er nánar fjallað um hvernig bankinn hafi látið til sín taka í baráttunni við fátækt eða hvort hann ætli að halda áfram á þeirri vegferð. Neðar er svo fjallað um samfélagsábyrgð,“ segir Sanna.

Sanna bendir á að bankinn gæti gert ýmislegt til að hjálpa konum. „Konur eru í meirihluta í þeim láglaunastörfum sem teljast til hefðbundinna kvennastétta, líkt og umönnunarstörf. Ætlar bankinn að bjóða sérkjör fyrir þær konur sem greiða mánaðarlega um marga þúsundkarla í útvexti af hárri yfirdráttarheimild sinni sem þær hafi ekki náð að greiða niður? Eða samrýmast fátækar konur, ekki þeim jafnréttismálum sem Íslandsbankinn er að leitast við að vinna að núna? Þurfa þær konur bara að bíða? Eins og svo oft áður? Fá sömu láglaunakonurnar sem fá greiddar um 300.000 krónur inn á reikninginn sinn mánaðarlega, undanþágu frá því að greiða árlegt gjald vegna bankaábyrgðar sem þær nota sem tryggingu vegna leigusamninga?,“ spyr Sanna.

Dýrt að vera fátækur

Hún heldur áfram og nefnir nokkur dæmi: „Ætlar bankinn að afnema hraðbankagjöld fyrir fátæku láglaunakonurnar sem maxa VISA og taka reglulega út af kortinu sínu í gegnum hraðbankann og millifæra allann þann pening inn á almennan bókarlausan til að geta greitt reikninganna, því launin voru búin svo snemma í mánuðinum? Það er dýrt að vera fátækur og gjöldin eru fljót að hrannast upp þegar viðkomandi tekur út frekar háar upphæðir af VISA og er kominn í vítahring skuldafens. Er þetta ekki kjörið verkefni í jafnréttisplaggið ykkar kæri Íslandsbanki? Að hjálpa láglaunakonum úr skuldafeni með því að afnema óþarfa gjaldtöku? Sýnir það ekki samfélagslega ábyrgð í verki að hagnast ekki af þeim sem standa verst í samfélaginu?“

Hún segir þetta útspil Íslandsbanka sýna að Ísland þarf öðru vísi banka. „Jafnrétti verður aldrei náð fyrr en við erum öll laus úr viðjum kúgunar, þar sem helsta ójafnréttið á götum margra er efnahagslegt ójafnrétti og bankar eiga vissulega sinn hlut í að viðhalda því. Við þurfum virkilega á samfélagsbanka á að halda, þar sem markmiðið snýst um að þjóna hagsmunum almennings. Fjárhagslega drifnir bankar sem starfa að því markmiði að skila hluthöfum sínum gróða eru ekki lausnin sama hversu falleg jafnréttisáætlun þeirra gæti orðið. Með einni hendi er verið að vinna að því að auka á sýnileika kvenna, þar sem hallar á þær en með hinni hendinni hafa bankarnir vald til þess að ýta fátækum konum og þeim sem hafa það allra verst í samfélaginu niður í efnahagslegt öngþveiti.“

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Fréttir
Fyrir 21 klukkutímum

Sjáðu myndbandið: Bandbrjálað veður á Ólafsfirði í gærkvöldi – „Nú erum við að bjarga því sem skiptir mestu máli“

Sjáðu myndbandið: Bandbrjálað veður á Ólafsfirði í gærkvöldi – „Nú erum við að bjarga því sem skiptir mestu máli“
Fréttir
Fyrir 21 klukkutímum

Aron Leví ber Baldvin þungum sökum: „Frethólkurinn sem svaraði ekki óléttri kærustunni minni í fjóra mánuði“

Aron Leví ber Baldvin þungum sökum: „Frethólkurinn sem svaraði ekki óléttri kærustunni minni í fjóra mánuði“
Fréttir
Í gær

Möguleiki á rafmagnsleysi, lokun svæða og rýmingu húsnæðis fyrir vestan og norðan

Möguleiki á rafmagnsleysi, lokun svæða og rýmingu húsnæðis fyrir vestan og norðan
Fréttir
Í gær

Veðrið verður verst á höfuðborgarsvæðinu eftir klukkan fimm

Veðrið verður verst á höfuðborgarsvæðinu eftir klukkan fimm
Fréttir
Í gær

Spáin virðist ætla að ganga eftir: Farið að hvessa fyrir norðan – Skólahald fellt niður á Akureyri

Spáin virðist ætla að ganga eftir: Farið að hvessa fyrir norðan – Skólahald fellt niður á Akureyri
Fréttir
Í gær

Sigmundur Davíð bæði skúrkur og hetja

Sigmundur Davíð bæði skúrkur og hetja