Leikarinn Örn Árnason segir að miklir fordómar séu í samfélaginu gagnvart Breiðholtinu. Örn hefur sjálfur verið búsettur í Breiðholti frá árinu 2015 og líkar honum vel í hverfinu, að eigin sögn.
Örn lætur til sín taka í Facebook-hópnum Íbúasamtökin Betra Breiðholt en tilefnið eru skrif Maríu Lilju Þrastardóttur á dögunum um pistil sem Áslaug Arna Sigurbjörnsdóttir skrifaði.
„Áslaug Arna er ekki útlensk, fátæk eða úr blokk í fellunum. Hún er hámenntuð rík Garðabæjarmær og DÓMSMÁLARÁÐHERRA. Ég held að færri manneskjur njóti meiri forréttinda í heiminum. Hún er á toppnum og þarf engan hlífðarskjöld frá pöpulnum,“ sagði María Lilja.
Hringbraut vakti fyrst athygli á skrifum Arnar í Breiðholtshópnum um orð Maríu Lilju, en í færslunni sagði hann:
Sæl veriði. Í ljósi umræðu um Breiðholtið okkar (hef verið hér síðan 2015 og líkar vel!) þá kemur berlega í ljós að þegar fólk er að velta fyrir stétt og stöðu hvað það eru miklir fordómar ríkjandi gagnvart breiðholtinu. Nú eru ritdeilur milli fólks um orðanotkun dómsmálaráðherra á orðinu „þeir“…sem margir segja að sé karllægt orðalag. Ætla ekki að hafa skoðun á því en á einum stað las ég ummæli um Áslaugu Örnu…þekki hana ekki en ritara fannst rétt að hnýta í hana með tilleggi í Breiðholtið,“ segir Örn og bætir ummælum Maríu Lilju við færsluna. Hann segir svo að lokum:
„Ekki úr Fellunum…En ef hún hefði verið úr Fellunum…væri hún þá annars flokks?…en reyndar er hún Árbænum!..en hvað um það…pirripú!“
Óhætt er að segja að íbúar taki undir þetta og benda þeir á ófáa Breiðhyltinga sem hafa skarað fram úr á ýmsum sviðum. Nicole Leigh Mosty, fyrrverandi þingmaður, bendir þó á annan mikilvægan punkt í þessari umræðu. María Lilja nefndi nefnilega einnig að Áslaug Arna væri ekki útlensk eða fátæk.
„Finnst ykkur í lagi að það skuli dæma fólk vegna uppruna og félagsleg bakgrunn almenn sem sagt það er í lagi að segja hún er ekki útlensk eða fátækt? Eða er það bara fyrir neðan öllu að tala illu um Breiðhyltingar? Hvað þá með okkur sem eru útlensk fátækt og búa í Breiðholti? Eigum við nokkra séns? Eigum við ekki vera sammála um að það er út í hött að skilgreina og níðast á fólk með fordóma almenn?“