Landsréttur hefur staðfest úrskurð Héraðsdóms Reykjavíkur þess efnis að karlmaður, sem grunaður er um kynferðisbrot gegn ungri stúlku, verði gert að sæta gæsluvarðhaldi þar til á morgun. Úrskurður héraðsdóms féll á laugardag en Landsréttur staðfesti úrskurðinn á þriðjudag.
Að því er fram kemur í greinargerð lögreglu hafði stúlkan gist á heimili mannsins ásamt fleirum. Sagði stúlkan að hún hefði vaknað þegar maðurinn káfaði á henni undir teppi þar sem hún lá í sófa. Þá hefði hann spurt hvort karlmenn hefðu „einhvern tíma borgað henni“ eins og það er orðað í greinargerð lögreglu.
Stúlkunni tókst að hringja eftir aðstoð eftir atvikið umrædda nótt og handtók lögregla manninn síðar sömu nótt. Hann var í annarlegu ástandi, sjáöldur hans útþanin og þá er hann sagður hafa talað samhengislaust.
„Aðspurður kvaðst hann ekki vita hvað hefði gengið á en hann hafi verið sofandi í sófanum. Í kjölfarið hafi verið framkvæmd leit í íbúðinni og tæknideild framkvæmt vettvangsrannsókn. Íbúðin hafi verið ósnyrtileg, blóðdropar á gólfi, veggjum, sófa og inni á baðherbergi. Þá hafi fundist notaðar sprautur og nálar ásamt leifum af ætluðum fíkniefnum á víð og dreif um íbúðina. Meðal annars hafi fundist notuð sprautunál í sófa þar sem stúlkurnar hafi sofið. Þá hafi verið tveir hnífar á stofuborði auk þess sem haglabyssa hafi fundist í fataskáp í svefnherbergi. Hafi framangreindir munir verið haldlagðir. Kærði hafi verið yfirheyrður fyrr í dag og neitað að hafa brotið á brotaþola. Sagðist hann hafa sprautað sig með kókaíni í stofusófa og svo sofnað í sófanum,“ segir í úrskurði sem héraðsdómur felldi.
Í greinargerð lögreglu kom fram að brýnt þætti að maðurinn sætti gæsluvarðhaldi þar til skýrslutökur hefðu farið fram. Féllst Landsréttur á það.