Helstu niðurstöður rannsóknarinnar voru birtar á vef Embættis Landlæknis í dag. Þar kemur fram að meðaldvalartími sjúklinga sem bíða innlagnar á spítalann er alltof langur, eða 22,8 klukkustundir síðastliðinn ágúst. Þessi tími hefur aldrei verið lengri utan flensutímabila.
„Þá fer þeim sjúklingum fjölgandi sem dvelja svo dögum skiptir á bráðamóttökunni. Ástæður þessa eru skortur á hjúkrunarfræðingum á legudeildum sem og að hlutfallslega fleiri sjúklingar leggjast nú inn af bráðamóttöku en áður vegna flutnings bráðastarfsemi hjartagáttar. Húsnæði bráðamóttöku ber engan veginn þann fjölda sjúklinga sem þar dvelja einatt og eru gerðar alvarlegar athugasemdir við það í skýrslunni. Þá er sýkingavörnum verulega ábótavant við þessar aðstæður.“
Þó kemur fram að bráðamóttöku tekst ennþá að sinna bráðahlutverki sínu. Þeir sem eru veikastir fá þjónustu og er meðaldvalartími þeirra sem útskrifast heim nánast óbreyttur, eða um 5 klukkustundir.
Í skýrslunni er farið yfir viðbrögð Landspítala við ábendingum úr fyrri úttekt og getið um aðgerðir heilbrigðismálaráðuneytis. Fram kemur að brugðist hefur verið við flestum fyrri ábendingum. Talið er brýnt að Landspítali opni legudeild sem tekur við sjúklingum af bráðamóttökunni eða þá að sjúklingum verði dreift með öðrum hætti svo það séu ekki of margir að dveljast á bráðamóttöku hverju sinni.
