Lögreglan á Vesturlandi veitti ökumanni á stolnum bíl eftirför í gær frá Akrafjalli að Melahverfi. Ökumaðurinn missti stjórn á bílnum þar, ók út af og við það valt bíllinn og endaði á hægri hliðinni.

Skömmu áður hafði verið tilkynnt til lögreglunnar að bíl hafi verið stoltið við Gamla Kaupfélagið á Akranesi. Lögreglumenn á Akranesi mættu bílnum á Akrafjallsvegi þar sem honum var ekið á 139 km hraða í átt að hringtorginu við Hvalfjarðargöng. Ökumanni bílsins var gefið merki um að stöðva aksturinn, sem hann gerði ekki og var því bílnum veitt eftirför.

Þrátt fyrir að lögreglan væri með forgangsljós tendruð þá jók ökumaðurinn ferðina og ók áfram út úr hringtorginu norður Vesturlandsveg á ofsahraða. Mikil umferð var á Vesturlandsvegi og skapaðist mikil hætta vegna þessa.

Lögreglumenn komu síðan að bílnum við gatnamótin að Melahverfi þar sem hann var utan vegar á hliðinni. Ökumaður var handtekinn á staðnum grunaður um nytjastuld á bifreiðinni og akstur undir áhrifum ávana- og fíkniefna.

Ökumaðurinn var fluttur með sjúkrabíl á slysadeild Heilbrigðisstfonunar Vesturlands til skoðunar. Hann reyndist ekki slasaður og var vistaður í fangaklefa að skoðun lokinni.