„Þrátt fyrir varnaðarorð ráðuneytisstjórans var ég grunlaus og ekki undir þetta búinn. Ég hélt að hann hefði verið að grínast. Nú vissi ég betur.“
Þetta segir Svein Harald Øygard, fyrrverandi seðlabankastjóri Íslands, í viðtali við Viðskiptablaðið í dag. Svein er staddur hér á landi til að kynna bók sína, Í víglínu íslenskra fjármála, sem fjallar meðal annars um íslenska efnahagshrunið og tíma hans í Seðlabankanum.
Svein Harald er hagfræðingur og starfaði hann fyrir ráðgjafafyrirtækið Mckinsey þegar hann fékk óvænt símtal frá Íslandi. „Viltu verða seðlabankastjóri á Íslandi,“ var hann spurður og Svein Harald var ekki lengi að svara því játandi.
Davíð Oddsson, fyrrverandi formaður Sjálfstæðisflokksins og síðar ritstjóri Morgunblaðsins, hafði gegnt embætti seðlabankastjóra áður en Svein Harald var ráðinn. Davíð var ekki sáttur við að þurfa að yfirgefa bankann en svo fór að honum var bolað burt með lagasetningu.
Í viðtalinu við Viðskiptablaðið segir Svein Harald að hann hafi verið tilbúinn að takast á við verkefnið, en tvær grímur hafi runnið á hann eftir samtal við ráðuneytisstjóra forsætisráðuneytisins í Noregi. Hann kveðst hafa átt fund með ráðuneytisstjóranum áður en hann steig upp í flugvélina til Íslands og verið spurður hvort hann væri tilbúinn.
„Já, það held ég, svaraði ég. Hann spurði aftur, en ertu tilbúinn? Já, endurtók ég og sagðist hafa nýtt hverja stund til að kynna mér stöðuna. Gott og vel, en ertu raunverulega tilbúinn, spurði hann í þriðja sinn. Núna var ég ekki lengur viss og starði orðlaus á hann. Þá spurði hann, hefurðu lesið Íslendingasögurnar og hvernig ættflokkarnir hjuggu höfuðið af hver öðrum þegar til átaka kom? Þá kveikti ég loksins á perunni og skildi hvað hann var að fara.“
Í Viðskiptablaðinu er bent á að ráðning hans í stöðu seðlabankastjóra hafi vakið mikla athygli í Noregi. Norskir fjölmiðlar hafi fylgst vel með og viðskiptafréttamiðillinn E24 gert sér mat úr ummælum sem Davíð Oddsson lét falla á landsfundi Sjálfstæðisflokksins árið 2009. Þá sagði Davíð berum orðum að Svein Harald væri drullusokkur og væri svo lítt þekktur að leitarvél Google finni hann ekki.
„Þetta var áttunda mest lesna fréttin á vefnum þetta árið og var nú enginn skortur á viðskiptafréttum í Noregi þetta viðburðaríka ár,“ segir Svein Harald i viðtalinu. „Þarna var ég sagður hafa verið tæki minnihlutastjórnarinnar í því að bola honum frá völdum í bankanum, einhvers konar efnahagslegur málaliði. Þrátt fyrir varnaðarorð ráðuneytisstjórans var ég grunlaus og ekki undir þetta búinn. Ég hélt að hann hefði verið að grínast. Nú vissi ég betur.“
