Í vikunni var kveðinn upp dómur í Héraðsdómi Reykjavíkur á hendur Birgi Brynjarssyni, dæmdum barnaníðingi, sem ákærður var fyrir fjölda afbrota, til dæmis stuld, svik, fíkniefnalagabrot og umferðarlagabrot.
Birgi var ekki gerð refsing og voru rökin fyrir því að á tímabili brotanna hafi hann glímt við geðræn veikindi og hafi flest brotin verið annarleg. Þetta er í annað skiptið á stuttum tíma sem Birgir sleppur við dóm þrátt fyrir að brot hans teljist sönnuð. DV greindi frá því í fyrra að þriggja mánaða skilorð fyrir ýmiss brot.
DV hefur heimildir fyrir því að Birgi hafi verið sleppt úr gæsluvarðhaldi eftir að dómur féll og gangi nú laus. Hann hafi með öðrum orðum ekki verið vistaður á viðeigandi stofnun, í það minnsta að svo stöddu. Í dómi kemur þó fram að hann hafi sýnt af sér ógnandi hegðun, hann var til að mynda handtekinn með kjötexi í verslunni Vikivaka á Barónsstíg.
Ákæruliðirnir í nýjasta málinu eru átján, en brotin eiga að hafa átt sér stað á milli nóvembers 2017 fram í júní 2019. Á meðal þess sem Birgir var kærður fyrir var sí endurtekinn þjófnaður. Hann á meðal annars að hafa stolið fjölda tækni- og tölvuvara frá ýmsum stöðum, til dæmis græju úr Bang og Olufsen sem metin var á 109.900 krónur og prentara frá Landspítalanum metin á 230.000 krónur.
Sérstaka athygli vekur fjársvikamál sem beindist að Sjálfstæðisflokknum. Sannað þótti að Birgir hafi skráð pítsur frá Domino’s að andvirði 56.140 króna á Sjálfstæðisflokkinn. Birgir neitaði sök en kannaðist þó við að hafa pantað pítsur í tvígang og látið setja á reikning flokksins. Hann taldi sig hafa fulla heimild fyrir því þar sem hann hafi fundað á heimili um pólitísk málefni.
Hann reyndi líka að setja fartölvu og spjaldtölvu frá Tæknibæ að andvirði 260.000 króna á reikning Sjálfstæðisflokksins, án þess að hafa leyfi flokksins fyrir því.
Birgir var þar að auki kærður fyrir mörg fíkniefnalagabrot, þar á meðal eitt er hann gekk vopnaður kjötexi með fíkniefni á sér í versluninni Vikivaka. Birgir keyrði auk þess í nokkur skipti próflaus undir áhrifum fíkniefna.
Birgir fékk enga refsingu, að undanskildu því að hann verði sviptur ökuréttindum og gert skylt að sæta upptöku á nokkrum grömmum af tóbaksblönduðu kannabisefni, kjötexi og dúkahníf. Auk þess þarf hann að greiða málsvarnarlaun.
Ástæða þess að hann er ekki vistaður í öryggisgæslu er það sem á mannamáli mætti kalla lagaflækjur. Saksóknari klúðraði því að fara fram á öryggisgæslu í framhaldsákæru á tilsettum tíma. Dómari hafði því engin önnur úrræði en að sleppa Birgi.
