Fyrirtæki sem sérhæfa sig í vetrarferðamennsku hafa neyðst til að breyta og aflýsa ferðum í vetur vegna snjóleysis, einkum sunnan- og vestanlands. Ferðafélag Íslands hefur til dæmis aflýst fyrirhugaðri miðnæturferð upp á Snæfellsjökul um næstu helgi en 30 manns höfðu bókað sig í ferðina.

Morgunblaðið skýrir frá þessu í dag. Haft er eftir Páli Guðmundssyni, framkvæmdastjóra Ferðafélagsins, að snjóleysið og vætan í vetur hafi mikil áhrif. Félagið hefur að hans sögn þurft að breyta eða fresta fleiri ferðum í vetur, sérstaklega í Landmannalaugar enda sé víða krapi og vatnselgur á leiðinni þangað.