Ákveðinn þrýstingur innan lögreglunnar hefur myndast um að Haraldur Johannessen ríkislögreglustjóri segi af sér embætti. Hann virðist ætla að sitja sem fastast og nær ómögulegt er að víkja honum úr starfi samkvæmt lögum um réttindi og skyldur starfsmanna ríkisins. Ef embætti ríkislögreglustjóra og lögreglustjórans á höfuðborgarsvæðinu er hins vegar sameinað og fyrrnefnda embættið lagt niður myndi Haraldur þurfa frá að hverfa. Ef svo verður er hann ekki á flæðiskeri staddur því hann heldur óbreyttum launakjörum í tólf mánuði eftir að embættið er lagt niður. Samkvæmt tekjublaði DV var Haraldur með tæplega 1,5 milljónir á mánuði í fyrra. Haraldur gæti því haft það ljúft þessa tólf mánuði með alls 18 milljónir frá ríkinu, auk annarra launatengdra fríðinda.