Dagný Magnea Harðardótt­ir, fyrrverandi skrifstofustjóri Ráðhússins á Akureyri og starfsmaður skrifstofu borgarstjórnar í Reykjavík, er látin. Dagný var yngst þriggja systra. Systur hennar eru Jenný Kamilla og Oddný Harðardóttir, þingmaður Samfylkingarinnar.

Dagný Magnea lést þann 20. september 2019 á líknardeild Landspítalans í Kópavogi. Fjölmargir minnast hennar bæði á Facebook og í minningargreinum í Morgunblaðinu. Dóra Björt Guðjónsdóttir, borgarfulltrúi Pírata skrifaði samúðarkveðju á Facebook-síðu systur hennar, Oddnýju og segir: „Dagný var yndisleg kona og dýrmætt að fá að kynnast henni.“

Oddný sjálf skrifar fallega minningargrein í Morgunblaðið um systur sína. „Hún hét Dagný Magnea og var litla syst­ir mín. Ég var fjög­urra ára þegar hún fædd­ist. Dæja var hún kölluð, hlát­ur­mild og glaðlynd frá fyrsta degi og þannig auðgaði hún líf okk­ar allra, jafn­vel á meðan drungi skilnaðar for­eldra okk­ar var yfir heim­il­inu og hún yngst og viðkvæm­ust. Mig grunaði ekki þá að hún ætti eft­ir að verða sú sem ætíð veitti mér stuðning og skjól með skýrri sýn á til­ver­una og góðum ráðum á erfiðum stund­um. Dagný syst­ir mín var sú sem ég gat alltaf reitt mig á, líka þegar að mamma okk­ar dó langt fyr­ir ald­ur fram. Og raun­ar var hún öll­um sín­um nán­ustu ómet­an­leg stoð og stytta,“ skrifar Oddný.

Hún segir enn fremur að hún hafi einungis starfað í tvo mánuði hjá Reykjavíkurborg þegar hún greindist með krabbamein. „Dæja var orðin tveggja barna móðir þegar hún lét draum­inn um fram­halds­nám ræt­ast. Svo fór að hún lauk há­skóla­prófi með glæsi­brag og fékk starf þar sem mennt­un henn­ar og mann­kost­ir nutu sín. Dagný hóf störf hjá Reykja­vík­ur­borg árið 2018 og var aðeins búin að vinna hjá borg­inni í um tvo mánuði þegar að hún greind­ist með krabba­mein. Henni líkaði nýja vinn­an vel og var ánægð með flutn­ing­inn til Reykja­vík­ur. Við höfðum hugsað okk­ur gott til glóðar­inn­ar og lagt á ráðin um enn fleiri sam­veru­stund­ir þar sem stutt væri að fara bæði á milli vinnustaða okk­ar og heim­ila. En þá greip ill­vígt krabba­mein inn í og nú verða sam­veru­stund­irn­ar ekki fleiri,“ skrifar Oddný.