Tilkynnt var um þjófnað á ferðatösku til lögreglunnar á Suðurnesjum um helgina. Viðkomandi hafði skilið eftir ferðatösku bak fyrir bifreið sína fyrir utan hótel í umdæminu. Þegar eigandinn vitjaði svo töskunnar var hún horfin.

Í skeyti frá lögreglunni á Suðurnesjum kemur fram að á eftirlitsmyndavélum hafi sést hvar ökumaður annarar bifreiðar kom aðvífandi, gramsaði í töskunni og hafði hana svo á brott með sér.

„Lögregla hafði uppi á manninum á höfuðborgarsvæðinu og í viðræðum þeirra viðurkenndi hann að vera með töskuna í bifreið sinni.  Honum var gert að skila henni á stundinni og ætlaði hann að verða við því,“ segir lögregla.

Þá tilkynntu erlendir ferðamenn um þjófnað á bakpoka á höfuðborgarsvæðinu. Í honum voru dróni og fleiri munir.

Enn fremur var tilkynnt um innbrot í bát sem lá við festar í Grindavíkurhöfn. Sterk verkjalyf voru tekin úr lyfjakassa en einskis annars var saknað.