Orkupakkinn hefur verið í umræðu á Alþingi síðan í morgun en það var mikið hlegið þegar Guðlaugur Þór Þórðarson utanríkisráðherra og Sigmundur Davíð Gunnlaugsson, formaður Miðflokksins, tókust á. Hringbraut birti myndband af þessu.
Sigmundur Davíð sakaði Guðlaug Þór um að hafa ekki svarað einni einustu spurningu og bætti síðan við að Guðlaugur Þór væri með þráhyggju gagnvart sér.
Þá kom Guðlaugur Þór í pontuna, hlær og segir:
„Þar kom að því, ég er kominn í meirihluta þjóðarinnar sem er með þráhyggju fyrir Sigmundi Davíð Gunnlaugssyni að hans mati.“
Þá skaut Sigmundur Davíð inn í og sagði: „Það er langt síðan.“
Guðlaugur Þór missir sig þá og nánast allur þingsalurinn með honum
„Að sjálfsögðu, við erum öll þar. Við erum öll þar. Háttvirtur þingmaður, þú ert búinn að átta þig á þessu. Þetta gengur allt út á þig. Allt út á þig. Þriðji orkupakkinn, þetta er aukaatriði. Við erum öll með þráhyggju út af þér. Við getum ekki hugsað um annað en þig. Þú sást þetta.“
Sjáðu þetta sprenghlægilega atvik í spilaranum hér fyrir neðan.
