Í gærkvöldi gaf aðdáandasíða Hatara út yfirlýsingu eftir tónleika þeirra í Lundúnum.

Þar er talað um að aðdáandi hafi gripið í klof Klemens, eins meðlims hljómsveitarinnar. Aðdáandasíðan fordæmir verknaðinn og biðlar til fólks að hætta slíkri hegðun.

„Meðlimir Hatara tengjast aðdáendum sínum líkt og engin önnur hljómsveit. Við ættum að virða það. Einhver kom við klof Klemensar í kvöld. Svo ég bið alla aðdáendur hljómsveitarinnar að gjöra svo vel að hætta að gera svona lagað! Þeir eru ekki vinir eða kærastarnir okkar og þeim líður óþægilega vegna svona hegðunar. Virðið þá bara, og njótið tilfinninganna og orkunnar sem þeir gefa okkur!“

Í athugasemd við yfirlýsinguna segir einn aðdáandi sem tók upp flutning þeirra í gær:

„Sé ekkert vel, en á augnabliki virtist Matthías reiður út í einn áhorfenda sem var einmitt þar sem að Klemens var. Klemens fór fljótlega af sviðinu eftir á, hneigði sig ekki eða neitt. Hann mætti ekki í neinar aðdáendamyndatökur með Einari og Mattías eftir tónleikana og engin þeirra mætti í eftirpartýið. Mjög ömurlegt að einhver hafi gert svona lagað, Ég er brjálaður!“

Í annarri athugasemd segir:

„Þetta er kynferðisbrot og þessi aðdándi ætti að skammast sín.“

Á myndbandi sem tekið var á tónleikunum sést ekki hvort að einhver hafi komið við Klemens á óviðeigandi hátt, en á ákveðnum tímapunkti virðist Matthías líta reiðilega í átt að áhorfenda á meðan Klemens virðist vera brugðið. Það atvik á sér stað þegar um ein mínúta og fjörtíu sekúndur eru liðnar af myndbandinu.

Hér að neðan má sjá myndbandið og svo yfirlýsinguna í heild sinni.