Sjö af rúmlega fjörutíu flugmönnum Air Iceland Connect hafa misst vinnuna það sem af er ári. Er það tilkomið vegna aðstæðna á markaði og samdráttar í farþegaflutningum, meðal annars vegna fækkunar erlendra ferðamanna. Rekstur innanlandsflugs hér á landi hefur verið þungur undanfarin ár. Bág staða flugfélaga, fákeppni og hækkandi olíuverð vega þar þyngst og eru neytendur langþreyttir á háum flugfargjöldum, sem kosta á við utanlandsferðir.

Greint var frá því á dögunum að Air Iceland Connect  hygðist minnka flugvélaflota félagsins og fækka vélum úr sex í fjórar. Þá hefur félagið fækkað ferðum til Egilsstaða og Ísafjarðar yfir vetrartímann og sömuleiðis hætt að fljúga á milli Keflavíkur og Akureyrar.

Í samtali við DV segir Árni Gunnarsson, framkvæmdastjóri Air Iceland Connect, að uppsagnir flugmanna tengist fyrrnefndum aðgerðum flugfélagsins.

„Við sögðum upp þremur flugmönnum í júní og núna um mánaðamótin er fjórum sagt upp til viðbótar. Við erum í raun að bregðast við aðstæðum á markaði. Það er samdráttur í hagkerfinu og við endurspeglum þann veruleika. Það þarf að aðlaga fjöldann að starfseminni.“

Í desember síðastliðnum kynnti starfshópur samgönguráðherra skýrslu þar sem lagt var til að niðurgreiddir yrðu um helming flugfarmiðar þeirra sem hafa lögheimili í tvö til þrjú hundruð kílómetra akstursfjarlægð frá höfuðborginni. Slíkt myndi kosta ríkissjóð tæplega milljarð á ári. Sigurður Ingi Jóhannsson, samgöngu- og sveitarstjórnarráðherra, hefur lýst yfir stuðningi sínum við tillöguna.