Frétt DV í gær um ummæli Hildar Lilliendahl um Ingólf Þórarinsson, betur þekktan sem Ingó Veðurguð, hefur vakið mikla athygli og sitt sýnist hverjum. Hildur sagði Ingó reyna við unglinga og níðast á feitum konum. Málið virðist skipta fólki í tvær fylkingar en þeir sem fordæma Hildi hafa ekki sparað stóru orðin.
Sjá einnig: Hildur segir Ingó Veðurguð hálfvita sem níðist á feitum konum og reyni við unglinga
Hildur hefur borið sig illa eftir fréttina, sem var byggð á orðum hennar á Twitter. Á sama miðli sagði hún í gær að hún væri miður sín. „Ég finn af kommentunum á DV að að velgengni söfnunarinnar í Málfrelsissjóð hefur skilað sér í auknum þunga í hatur fólks í minn garð. Ég hef ekki oft átt svona erfitt með að lesa í gegnum nokkra tugi ógeðskommenta,“ skrifaði Hildur meðal annars.
Hin þekkta baráttukona, Elísabet Ýr Atladóttir, fjallar um þetta á Twitter-síðu sinni og segir fjölmiðla græða á því að Hildur sé hötuð af mörgum. „Sannleikur um fjölmiðla: þeir græða á því að fólk hati Hildi Lilliendahl og gera í því að leyfa ógeðslegu andlegu ofbeldi, áreitni og ofsóknum gegn henni grassera sem þeir væru annars löngu búnir að ritstýra eða loka fyrir. Fullkomið kapítalískt feðraveldi,“ skrifar Elísabet Ýr.
Þessu svarar Heiðar Guðjónsson, áður Heiðar Már, forstjóri fjölmiðlafyrirtækisins Sýnar. Það félag rekur fjölda fjölmiðla en þar má helst nefna Stöð 2, Bylgjuna og Vísi. „Ekki er það sama Hildur sem villti á sér heimildir á netinu og veittist að Hafdísi Huld. Eða var dæmd fyrir meiðyrði? Og segir nú að ástsæll söngvari sé að áreita konur??? Eru kapítalískir fjölmiðlar að græða á henni? Virkilega?,“ skrifar Heiðar.
