Gunnar Smári Egilsson, fjölmiðlamaður og einn stofnanda Sósíalistaflokksins, skýtur fast á Miðflokkinn og grein Birgis Þórarinsson, þingmann flokksins, sem birtist í Morgunblaðinu. Í þeirri grein kemur hann Rodrigo Duterte, forseta Filippseyja, til varnar.

Duterte er þekktur fyrir aftökur án dóms og laga í stríði sínu gegn fíkniefnaneytendum. Birgir segir hann þó gífurlega vinsælan og telur að Ísland ætti ekki að gagnrýna landið og forsetann. Birgir fundaði með stuðningsmönnum Duterte í síðustu viku.

„Auk þess gat ég þess að forseti Filippseyja væri mjög vinsæll í heimalandinu, en 80 prósent landsmanna styðja hann í baráttunni gegn glæpagengjum fíkniefnanna þar í landi,“ segir Birgir í pistli sínum meðal annars.

Gunnar Smári gefur í skyn að það sé hræsni að styðja mann sem sé sakaður um að drepa fíkla meðan viðkomandi er í sama flokki og Klaustursþingmenn.

„Okei, Miðflokkurinn er sem sagt fylgjandi útrýmingu áfengis- og vímuefnasjúklinga. Gott fyrir okkur alkana að vita af því. Skýrir kannski hvers vegna ekkert hefur heyrst frá Gunnari Braga lengi, Birgir Þórarinsson hefur líklega leigt þyrlu, flogið út á Faxaflóa og hent Gunnari Braga út,“ segir Gunnar Smári.

Hann hjólar svo í Morgunblaðið í athugasemd við eigin færslu. „Morgunblaðið styður bæði Duterte á Filippseyjum og Bolsonaro í Brasilíu og er því fylgjandi ríkisstýrðu ofbeldi gagnvart bæði alkóhólistum og hinsegin fólki. Og blaðið styður líka ofsóknir Trump gegn innflytjendum í Bandaríkjunum. Blað allra landsmanna? Það var það svo sem aldrei en er það örugglega ekki lengur,“ segir Gunnar Smári.