Einn er í haldi lögreglu á Austurlandi eftir hnífstungu í heimahúsi í Neskaupstað í nótt, en sá handtekni gisti fangageymslur lögreglunnar á Eskifirði í nótt. Ákveðið verður í dag hvort farið verður fram á gæsluvarðhald yfir honum.

Atvikið átti sér stað í kringum miðnætti en sá slasaði var fluttur með sjúkraflugi á Landspítalanum. Óvíst er um líðan hans en í frétt Vísis um málið gerir Jónas Wilhelmsson Jensen, yfirlögregluþjónn ráð fyrir að hann hafi gengið undir aðgerð í nótt.

Lítið er vitað um atburðarrásina og gefur lögreglan ekki upp frekari upplýsingar um málið að svo stöddu. Tæknideild lögreglunnar á höfuðborgarsvæðinu mun aðstoða við rannsókn á vettvangi, en von er á teyminu austur síðdegis í dag.