Á morgun munu Sameinuðu þjóðirnar greiða atkvæði um tillögu Íslands varðandi það hvort rannsaka eigi stöðu mannréttinda á Filippseyjum. Tillagan varðar stríðið gegn fíkniefnum sem stjórnvöld á Filippseyjum standa í.
Stjórnvöld á Filippseyjum hafa sætt harðri gagnrýni fyrir þetta stríð sitt, en talið er að mannréttindi séu brotin á degi hverjum. Lögreglan þar í landi hefur meðal annars verið ásökuð um að drepa þúsundir manna.
Utanríkisráðherra Filippseyja, Teddy Locsin Jr. var ansi harðorður í garð Íslendinga í yfirlýsingu sem hann birti á Twitter í gær.
„Ef tillaga Íslendinga verður samþykkt þýðir það að allir sem unnu að henni fái bónusgreiðslur og það frá sjálfum eiturlyfjahringjunum.“
If the Iceland resolution wins that means bonuses for everyone who worked for it—from the drug cartels.
— Teddy Locsin Jr. (@teddyboylocsin) July 9, 2019
Teddy Locsin Jr. er stuðningsmaður forsetans Rodrigo Duterte, en það er hann sem stendur fyrir stríðinu gegn fíkniefnum. Báðir eru þeir afar umdeildir.
Á dögunum gengu fulltrúar Filippseyja af fundi þar sem tillaga Íslands var rædd óformlega.
