Skráðum kynferðisbrotum á höfuðborgarsvæðinu fjölgaði í maí miðað við fyrri mánuði en það er aðallega tilkomið vegna sérstakra aðgerða lögreglunnar gegn vændi og mansali. Fíkniefnabrotum fækkaði mikið og hafa ekki verið skráð eins fá fíkniefnabrot og síðan í apríl árið 2016.

Þetta kemur fram í tilkynningu frá Lögreglunni á höfuðborgarsvæðinu (LRH) þar sem farið er yfir afbrotatölfræði liðins mánaðar. Alls voru skráð 717 hegningarlagabrot á höfuðborgarsvæðinu í maí, svipaður fjöldi og undanfarna mánuði.

Skýrsluna má nálgast hér en þar kemur meðal annars fram að þjófnaðarbrot voru 307 talsins í maí, en líkamsárásir voru 97 talsins.

Tilkynning lögreglunnar um þetta er eftirfarandi:

„Skráð voru 717 hegningarlagabrot á höfuðborgarsvæðinu í maí og hefur fjöldi skráðra hegningarlagabrota haldist tiltölulega stöðugur síðustu þrjá mánuði. Þetta kemur fram í mánaðarskýrslu lögreglustjórans á höfuðborgarsvæðinu fyrir maí 2019. Þá kemur fram að á tímabilinu hafa litlar breytingar orðið á fjölda þeirra brota sem horft er sérstaklega til i skýrslunni.

Mikil fækkun varð á skráðum fíkniefnabrotum á höfuðborgarsvæðinu en ekki hafa verið skráð jafn fá fíkniefnabrot síðan apríl 2016. Vert er að nefna að það sem af er ári hafa verið skráð um tíu prósent færri fíkniefnabrot en voru skráð að meðaltali á sama tímabili síðastliðin þrjú ár á undan.

Mikil fjölgun var á skráðum kynferðisafbrotum í maí en það má einna helst rekja til aðgerða lögreglunnar í vændismálum. Undanfarnar vikur hefur LRH verið í sérstökum aðgerðum tengt mansali en vændi er ein af birtingarmyndum mansals. Þetta er einn af þeim þáttum í skipulagðri brotastarfsemi sem LRH leggur mikla áherslu á.

Heilt yfir fækkaði tilkynningum um þjófnað á milli mánaða en þó ber að nefna að tilkynningum um þjófnað á reiðhjólum fjölgaði nokkuð á milli mánaða. Lögreglan vill því nota tækifærið og benda fólki á óskilamunasíðu lögreglunnar inná www.logreglan.is en þar setur lögreglan meðal annars inn myndir af reiðhjólum sem hafa komið í leitirnar.“