„Núverandi meirihluta í borginni eru um margt mislagðar hendur. Nú getur hann bætt við því afreki að tryggja að samtímis sé offramboð og skortur á húsnæði.“

Svo segir í leiðara Morgunblaðsins í dag en ekki er útilokað að þar haldi á penna Davíð Oddsson, ritstjóri blaðsins og fyrrverandi forsætisráðherra. Hluti leiðarans er helgaður húsnæðismálum í höfuðborginni og er bent á að skortur hafi verið á húsnæði fyrir ungt og efnalítið fólk. Enginn hörgull er hins vegar á íbúðum fyrir hina efnameiri í miðborginni eins og bent var á í frétt Morgunblaðsins á dögunum og gengur meira að segja hægt að selja þær íbúðir.

„Um þessar mundir eru mörg hundruð íbúðir í sölu eða að koma í sölu í miðborginni. Nefna má Hafnartorg, Austurhöfn, Brynjureit, Frakkastígsreit, reiti við Hverfisgötu, Klapparstíg og Bríetartún. Oft eru þetta dýrar íbúðir og getur verðið farið alveg upp í milljón krónur á fermetra og jafnvel meira.“

Vitnað er í viðtal við Þorvald Gissurarson, forstjóra ÞG Verks, í Morgunblaðinu í laugardag en fyrirtækið hefur til dæmis byggt íbúðir við Hafnartorg.

„Vegna aðstæðna á markaði hefur fyrirtækið ákveðið að hægja á sölu íbúða þar til heildarmynd verður komin á svæðið og verslunarrekstur kominn af stað. Þorvaldur er þeirrar hyggju að rétt hafi verið að þétta byggð í miðbænum, en eftir á að hyggja hefði ef til vill átt að reisa ódýrari íbúðir á einhverjum þéttingarreitanna.“

Leiðarahöfundur segir að ekki sé hægt að skella skuldinni á verktaka enda hafi borgaryfirvöld ekki skipulagt ódýrar íbúðir á þéttingarreitum. Þannig hafi áhersla á þéttingu byggðar við miðborgina verið á kostnað þess að borgin breiddi úr sér þegar nær hefði verið að leggja áherslu á hóflega þéttingu samtímis í nýjum hverfum.

„Í viðtalinu við Þorvald kemur fram að nýjar íbúðir, sem reistar hafa verið á vegum ÞG Verks á Selfossi seljist hratt. Fermetraverðið á þeim íbúðum er um 350 þúsund krónur. Hann á hins vegar ekki von á því að skorti á hagstæðum íbúðum verði mætt á höfuðborgarsvæðinu á næstu 18 mánuðum. Algengt er að fermetraverð nýrra íbúða sé tugprósentum hærra á höfuðborgarsvæðinu og tvöfalt hærra í miðborg Reykjavíkur. Núverandi meirihluta í borginni eru um margt mislagðar hendur. Nú getur hann bætt við því afreki að tryggja að samtímis sé offramboð og skortur á húsnæði.“