DV greindi frá því í gær að Inga Sæland, formaður Flokks fólksins, hefði heimsótt Fjölskylduhjálp Íslands og verið miður sín yfir því að sjá engin páskaegg í páskaúthlutuninni. Nú hafa tveir menn sett sig í samband við Fjölskylduhjálpina og ætla að bæta úr páskaeggjaskortinum.
Í páskaúthlutun Fjölskylduhjálpar í gær var mikið úrval í boði fyrir hátíðirnar. En aðalnúmerið sjálft, páskaeggin, vantaði þó. Þetta fannst Ingu Sæland leiðinlegt, en hún var ekki ein um það. Tveir menn lásu um málið og gátu hreinlega ekki látið þetta viðgangast.
Annar þeirra er Helgi Vilhjálmsson, oftast kenndur við sælgætisframleiðslu sína Góu. Hann ætlar að styrkja Fjölskylduhjálp um páskaegg í úthlutun þeirra í Reykjanesbæ í dag. Hinn er ónefndur velunnari Fjölskylduhjálpar sem las frétt um málið og vildi bæta úr. Hann leggur til páskaegg fyrir þá sem fengu úthlutun sína í gær. Helgi gefur hundrað egg og hinn ónefndi maðurinn, sem vildi ekki láta nafn síns getið, gefur einnig hundrað egg.
Skjólstæðingum Fjölskylduhjálpar er því bent á að nálgast páskaegg hjá Fjölskylduhjálp í Iðufelli í dag á bilinu 14:00-16:00.