Sigurður Blöndal lést síðastliðinn föstudag. Sigurður sem búsettur var í Hveragerði starfaði um árabil sem kennari við góðan orðstír. Þá tók hann virkan þátt í félagsstarfi í bænum, t.d. mörgum uppsetningum Leikfélags Hveragerðis og þótti afburðaleikstjóri. Sigurður missti eiginkonu sína, Berglindi Bjarnadóttur árið 2010 en þau áttu þrjú börn sem eiga nú um sárt að binda. Þá átti Sigurður þrjú börn með fyrri konu sinni, Sigrúnu Pálínu Ingvarsdóttur.
Í Hveragerði ríkir djúp og mikil sorg og hafa bæjarbúar reynt af fremsta megni að styðja við bakið á börnum þeirra Sigurðar og Berglindar. Hefur verið stofnaður sérstakur söfnunarreikningur sem má finna neðst í þessari umfjöllun. Þar gildir að margt smátt gerir eitt stórt.
Sigurður var mikils metinn kennari og minnast fjölmargir hans á samskiptamiðlum. Kristinn Bjarnason segir:
„Allra besti kennari sem ég hef átt um ævina. Þín verður sárt saknað. Þú hefur fyllt líf hundruð barna af gleði og kærleik og fróðleik og sjálfur alið upp yndisleg börn og barnabörn. Takk fyrir allt Siggi! Þú varst einstakur og kenndir mér margt.“ Örvar Þór Atlason skrifar: „Blessuð sé minning þessa góða manns og frábæra kennara.“
Þá segir Heiða Rún Sveinsdóttir:
„Við trúum því að hann sé kominn í faðm Berglindar sinnar en eftir sitja börnin hans og fjölskylda í sárri sorg og langar mig því að biðja ykkur að hjálpa mér að létta undir með þeim á þessu erfiðu tímum.“
Munum að margt smátt gerir eitt stórt! Hér fyrir neðan má finna styrktarreikning fyrir börn Sigurðar og Berglindar:
