Viðskiptaráð Íslands og Samtök atvinnulífsins hafa stórgrætt á ríkisfyrirtækjum undanfarin ár. Þetta má sjá í svari Daða Más Kristóferssonar, fjármála- og efnahagsráðherra, við fyrirspurn Kristjáns Þórðar Snæbjarnarsonar, þingmanns Samfylkingarinnar. Vísir greindi fyrst frá.
Kristján spurði hvaða fyrirtæki, sem ríkið fer með ráðandi eignarhlut í, hafi átt aðild að Viðskiptaráði Íslands (VÍ) á árunum 2015-2025, og hvað þessi fyrirtæki hafa greitt í árgjöld og félagsgjöld til VÍ og fyrir aðild að Samtökum atvinnulífsins (SA) og aðildarsamtökum þeirra á sama tímabili.
Fyrirtækin sem um ræðir eru Betri samgöngur, Farice, Harpa ohf., Isavia, Íslandspóstur, Landsbankinn, Landsnet, Landsvirkjun, Matís, Neyðarlínan, Orkubúið og RARIK. Það sem af er ári hafa þessi fyrirtæki greitt um 245 milljónir til Viðskiptaráðs, Samtaka atvinnulífsins og aðildarsamtaka SA; Samtaka verslunar og þjónustu, Samtaka iðnaðarins, Samorku, Samtaka ferðaþjónustunnar og Samtaka fjármálafyrirtækja. Á síðasta ári nam fjárhæðin rúmlega 244 milljónum og árið 2023 nam hún tæpum 240 milljónum.
Frá árinu 2015 hefur ríkið því greitt rúmlega 2 milljarða til þessara samtaka, þar af 1,1 milljarð síðustu fimm árin.
Aðild að þessum samtökum er bindandi en hægt er að segja skuldbindingunni upp. Uppsagnafrestur hjá Viðskiptaráði miðast við áramót en þarf að berast fyrir 1. október en hjá Samtökum atvinnulífs og aðildarfélögum er uppsagnarfrestur ýmist sex eða tólf mánuðir. Sérstakt sjónarmið á við um Rarik og aðild þess að SA og Samorku. Þar er ekki um skuldbindingu að ræða en taka þarf tillit til kjarasamningsumboðs.
