Í byrjun árs kynnti Kú mjólkurbú ostinn Glaðning með pomp og prakt. Um er að ræða fyrsta lífræna hvítmygluostinn á markaðinum. Osturinn er þó ekki síður merkilegur fyrir þær sakir að hann er búinn til úr lífrænni mjólk frá Svíþjóð, sem er sérstaklega flutt inn til landsins vegna framleiðslunnar. Ekki er ólíklegt að þetta sé í fyrsta skipti sem mjólk er flutt inn til ostaframleiðslu. „Þetta helgast af því að það er ekki framleitt nægilega mikið magn af lífrænni mjólk hér á landi,“ segir Guðni Þór Sigurjónsson, framkvæmdastjóri fyrirtækisins.
Stjórnendur fyrirtækisins hafi því ákveðið að fara þessa leið og flytja inn sænska mjólk. „Þetta er fyrsti osturinn sem við framleiðum með mjólk erlendis frá. Það má því segja að um tilraunaverkefni sé að ræða en þetta fer ágætlega af stað,“ segir Guðni.
Kú mjólkurbú var stofnað árið 2009 af Ólafi Magnússyni og hóf framleiðslu ári síðar. Markmið fyrirtækisins hefur frá upphafi verið að berjast gegn fákeppni á mjólkurmarkaði. Í júní 2017 var tilkynnt um kaup Ölgerðar Egils Skallagrímssonar á fyrirtækinu.
