Neytendastofa hefur bannað fyrirtækjunum Krónunni og 17 sortum að nota duldar auglýsingar í markaðssetningu. Er talið að fyrirtækin hafi brotið gegn ákvæðum laga um eftirlit með viðskiptaháttum og markaðssetningu með því fá einstaklinga til að birta færslur á samfélagsmiðlum þar sem vörur Krónunnar og 17 sorta voru dásamaðar, en hvergi tekið fram að um auglýsingu væri að ræða.

Fram kemur á vef Neytendastofu að borist hefði ábendingar vegna meintra dulinna auglýsinga með færslun einstaklinga á samfélagsmiðlinum Instagram þar sem vörur 17 sorta og verslanir Krónunnar voru auglýstar. Um var að ræða 14 stöðuuppfærslur frá 12 einstaklingum sem birtust í desember 2016. Í færslunum var ágæti vara 17 sorta tíundað með einum eða öðrum hætti auk þess sem tekið var fram að vörurnar fengust einungis í verslunum Krónunnar. Stöðuuppfærslunar báru allar sömu myllumerkin, svosem #krónan, #17sortir og #aðeinsíkrónunni. Engin af færslunum var hins vegar merkt sem auglýsing eða tekið skýrt fram að um auglýsingu væri að ræða.

Fór Neytendastofa því fram á upplýsingar um það hvort einstaklingarnir hafi fengið greitt fyrir umfjallanirnar og hvernig staðið hafi verið að markaðssetningunni.

Að sögn Krónunnar og 17 sorta annaðist þriðja fyrirtækið milligöngu við einstaklingana við skipulagningu markaðssetningarinnar. Við meðferð málsins kom fram að einstaklingarnir höfðu þegið greiðslur fyrir umfjöllunina og því væri um auglýsingar að ræða. Færslurnar voru merktar með myllumerkjum með heitum fyrirtækjanna en Neytendastofa taldi merkingarnar ekki nægilegar til þess að neytendur gætu með góðu móti áttað sig á því að um auglýsingar væri að ræða.