Húsnæðisverð á Íslandi hefur hækkað sífellt hraðar undanfarna mánuði sem skýrist af bættri eignastöðu heimila, kaupmáttaraukningu og vexti í innlendri eftirspurn. Samkvæmt nýrri spá Greiningardeildar Arion banka gæti húsnæðisverð hækkað um allt að 30 prósent á næstu þremur árum. Samkvæmt nýútkominni skýrslu er „íbúðarlagerinn“ að tæmast. Með öðrum orðum hefur fjöldi íbúða sem eru til sölu á landinu ekki verið jafn lítill og nú í að minnsta kosti 11 ár. Á meðan húsnæðisverð utan höfuðborgarsvæðisins hefur hækkað um 20 prósent síðastliðna 12 mánuði er oft og tíðum sláandi munur á fermetraverði og sem dæmi nefna að hægt væri að kaupa bæði parhús og 5 herbergja íbúð á landsbyggðinni á meðan sama upphæð dugir fyrir örsmárri einstaklingsíbúð í Þingholtunum í Reykjavík.

Fjölgun ferðamanna hefur aukið eftirspurn eftir húsnæði á höfuðborgarsvæðinu, sem leiðir til hærra verðs. Telur Greiningardeildin að þróun á húsnæðismarkaði næstu misseri muni að miklu leyti ráðast beint og óbeint af framgangi ferðaþjónustunnar.

Þá kemur fram að jafnframt hafi húsnæðisverð utan höfuðborgarsvæðisins hækkað um 20 prósent síðastliðna 12 mánuði en sú hækkun er að mestu leyti drifin áfram af mikilli hækkun húsnæðisverðs í nágrannasveitarfélögum höfuðborgarsvæðisins.

En hvernig er ástandið nákvæmlega á fasteignamarkaðnum, nú í febrúarlok 2017, og hvað stendur íslenskri vísitölufjölskyldu til boða?

Hér er tekið gróft dæmi um hjón á höfuðborgarsvæðinu sem eiga fyrir útborgun í 35 milljóna króna íbúð. Hjónin eiga tvö börn og leita að íbúð með fjórum svefnherbergjum. Á höfuðborgarsvæðinu hrökkva 35 milljónir skammt ef íbúðin á að hafa nóg pláss fyrir fjóra fjölskyldumeðlimi en ódýrasta íbúðin með fjórum svefnherbergjum kostar 36,9 milljónir. Sætti fjölskyldan sig við íbúð með þremur svefnherbergjum eru einhverjir kostir í boði.

Við Rofabæ í Árbænum er til sölu 91,1 fermetra íbúð með 3 svefnherbergjum á 34,9 milljónir. Á sama verði má finna 50 fermetra, tveggja svefnherbergja risíbúð í Vesturbænum. Þá er til sölu 64 fermetra íbúð í fjórbýlishúsi á Vitastíg, með tveimur svefnherbergjum, á 34 milljónir.

Um leið og komið er út fyrir höfuðborgarsvæðið eru ákjósanlegri kostir í boði. Við Keflavíkurveg á Hellissandi má til að mynda kaupa nýlegt, rúmlega 200 fermetra einbýlishús á 35 milljónir. Við Laufskála á Hellu er hægt að festa kaup á 240 fermetra einbýlishúsi með 5 svefnherbergjum á 34,9 milljónir.

Þá væri einnig hægt að festa kaup á rúmlega 200 fermetra einbýlishúsi í Stykkishólmi, með fjórum svefnherbergjum á 34,9 milljónir og einbýlishús við Bakkagötu á Kópaskeri sem kostar aðeins tæp 13 prósent af kaupverðinu sem fjölskyldan ræður við, eða 4,5 milljónir.

Hér er um að ræða valdar eignir af Fasteignavef Vísis þann 23 febrúar síðastliðinn og ber því að geta þess að listinn er ekki tæmandi