„Íslendingar eru að nota þessa aðferð til að græða 100 þúsund á dag að meðaltali og hætta að vinna fyrir aðra.“

Þetta segir í kynningartexta sem hefur síðustu vikur verið deilt á Facebook af nokkrum erlendum Facebook-síðum sem haldið er úti af svikahröppum. Facebook er borgað sérstaklega til að koma skilaboðunum á framfæri við Íslendinga. Þar er sagt að Björgólfur Thor Björgólfsson, eða Thor Björgólfsson, hafi ljóstrað upp um ótrúlega aðferð til að græða fúlgur fjár á skömmum tíma. Flestir ættu að gera sér grein fyrir að hér er um blekkingu að ræða. Mikið er þó lagt í að koma þessu á framfæri.

Sjá einnig: „Jónína“ vann 75 milljónir í kaffipásunni: Ekki er allt sem sýnist

Þegar smellt er á færsluna á Facebook opnast vefsíða þar sem má lesa ítarlega grein þar sem segir að Thor Björgólfsson hafi sett Ísland á annan endann eftir að hann ljóstraði upp aðferðinni hvernig hinn dæmigerði Íslendingur geti grætt fúlgur fjár með því að vinna heima.

Þar segir:

„Við erum að sjá mikla aukningu um að fólk ákveði að finna fyrir sig sig sjálft. Aldrei í sögu Íslands höfum við séð annað eins tækifæri til að græða gríðarlega fjármuni á skömmum tíma.“

Ástæðan fyrir þessu á að vera:

„Nýtt hagkerfi hefur skapast sem 99.9% heimsbyggðarinnar veit ekki af. Ímyndið ykkur að kaupa google.com þegar netið var að byrja. Þetta er sama tækifæri nema að það er hundrað sinnum áhrifaríkara. Í raun getur hver sem er nýtt sér þetta nýja hagkerfi í sína þágu.“

Þá segir að tækifærið sé bundið við ákveðin tíma, hægt sé að nýta sér það næstu vikur og mánuði til að raka inn fé. Haft eftir Thor Björgólfssyni:

„Það er í raun hættulegt að tala um þetta, því elítan vill ekki að hinn venjulegi Íslendingur verði þetta ríkur. Ástæðan er því ríkari sem þjóðin er, því minni völd hafa þeir sjálfir. Þeir hata mig fyrir að ljóstra upp um leyndarmálið.“

Eins og bent hefur verið á er um blekkingu að ræða og hefur Björgólfur Thor Björgólfsson ekkert með hana að gera. Mikið er lagt í blekkinguna og undir umfjölluninni má sjá fjölmörg fölsuð komment þar sem gefið er í skin að aðferðin hafi gjörbreytt lífi þeirra.

DV hefur áður fjallað um blekkingar í þessa veru sem er sérstaklega beint að Íslendingum. Þann 27. September birti DV frétt þar sem reynt var ða telja Íslendingum trú um auðvelda aðferð til að vinna milljónir. Í það skiptið var andlit hinnar glaðlyndu Francisca Mwansa sem starfar í Bónus notað til að reyna auka trúverðugleika fréttarinnar.