Ný svikamylla herjar á Íslendinga
„Jónína Rúnarsdóttir mætti á morgunvaktina hjá Bónus eins og alla daga, en það sem gerðist í pásunni hennar átti eftir að breyta lífi hennar að eilífu.“
Á þessum orðum hefst frétt sem birtist á á netinu og er fréttin eignuð „fréttasíðunni“ Daily News. Fréttin er þó engin frétt, heldur tilraun til að blekkja og svíkja Íslendinga sérstaklega. Í raun og veru andlit svikamyllu, í formi fjárhættuspils er heyrir undir Zodiac spilavítið svokallaða og, líkt og áður segir, er sérstaklega beint að Íslendingum.
Aðalmynd fréttarinnar er ekki af konu sem heitir Jónína Rúnarsdóttir heldur Francisca Mwansa, sem er starfsmaður í Bónus. Myndin er stolin af heimasíðu Bónuss og Francisca sjálf veit ekkert um málið. Viðtalið við Jónínu er sömuleiðis uppspuni frá rótum.
Eflaust kannast margir við andlit Franciscu en hún hefur um árabil glatt viðskiptavini með hlýlegu viðmóti. Francisca komst sömuleiðis í fjölmiðla eftir að vinkona hennar óskaði eftir aðstoð til að kaupa tölvu fyrir Franciscu en hún gat um tíma ekki talað við fjölskylduna sína sem býr Zambíu þar sem tölvan hennar bilaði og hún hafði ekki efni á ða kaupa nýja.
Að sjálfsögðu brást fólk vel við beiðninni og Francisca fékk nýja tölvu.
Fréttin hefur komið upp hjá mörgum Íslendingum á Facebook í dag. Sá sem stendur að baki henni hefur greitt Facebook sérstaklega til að beina henni að Íslendingum með því að markmiði að sem flestir sjái fréttina og láti blekkjast.
Í „fréttinni“ segir að Jónína sé hamingjusöm tveggja barna móðir sem hafði glímt við fjárhagsáhyggjur í lengri tíma.
Til að láta enda ná saman hafði Jóhanna unnið myrkranna á milli þar til líf hennar umbreyttist á morgunvaktinni í Bónus fyrir tveimur vikum.
Á síðunni segir:
„Þegar hún var að vafra um Facebook í pásunni sinni, sá Jónína síðu á netinu sem var að gefa 80 fría snúninga. Þar sem hún hafði engu að tapa og átti fríar 15 mínútur, ákvað hún að freista gæfunnar. Það sem gerðist 10 snúningum og 9 mínútum síðar gjörbreytti örlögum fjölskyldu hennar AÐ EILÍFU.“
Í framhaldinu segir að með einum snúningi hafi Jóhanna unnið meira en tuttuguföld árslaun sín, eða $662,259 dollara sem nemur rúmlega 75 milljónum ISK, í Mega Moulah pottinum.
Það er nokkuð augljóst að um svikamyllu er að ræða. Markhópur þeirra sem standa að baka síðunni eru Íslendingar. Nokkuð er vandað til verks með því markmiði að ná til sem flestra. Þó svo að textinn sé ekki alltaf í samhengi og nokkuð sé um málfarsvillur er þó ólíklegt að textinn komi beint af Google Translate.
Að auki eru falskir Facebook aðgangar með íslenskum nöfnum notaðir fyrir neðan fréttina. Þar virðist, við fyrstu sýn, sem að ósköp venjulegt fólk sé að ræða um hversu vel fjárhættuspilið gefur.
Líkt og áður segir er augljóst að um svik er að ræða en í „fréttinni“ segir að yfir 240 íslenskir spilarar hafi nú þegar unnið peninga í fjárhættuspilinu. Því er full ástæða til að vara fólk við með því að deila þessari frétt áfram svo fólk verði ekki fyrir barðinu á þessum svikahröppum.