Bæjarfulltrúi Samfylkingarinnar í Kópavogi, Bergljót Kristinsdóttir, óskaði eftir því á fundi skólanefndar að menntasvið hraði vinnu sinni vegna undirbúnings á hinsegin fræðslu í bæjarfélaginu.

Í bókun sem Bergljót lagði fram á fundinum sagði:

„Bæjarstjórn Kópavogs samþykkti 12 maí 2015 að óska eftir því að Menntasvið vinni umsögn og komi með tillögur að útfærslu á hinsegin fræðslu í grunnskólum Kópavogs eftir tillögu frá Samfylkingunni. Ekkert hefur bólað á þeirri umsögn. Undirrituð óskar efir að Menntasvið hraði vinnu sinni og leggi niðurstöður fyrir Skólanefnd hið fyrsta.“

Hinsegin fræðsla var samþykkt í Hafnarfirði í október á síðasta ári, en tillagan var vægast sagt umdeild.

Þar er gert ráð fyrir því að kostnaður vegna fræðslunnar nemi 875 þúsund krónum fyrsta árið, en 100 þúsund eftir það. Bærinn gerir þannig verksamning við Samtökin´78 um fræðslu fyrir allt starfsfólk bæjarins.

Samningurinn tryggir einnig að samtökin standa fyrir árlegri fræðslu fyrir nemendur í 8. bekk í öllum grunnskólum bæjarins og borgar bærinn 245 þúsund krónur á ári vegna hennar.

Í minnisblaðinu kemur fram að heildarkostnaður bæjarfélagsins á þessu ári verði um 1,5 milljón en verði síðan um hálf milljón eftir það.